Kodheli në Ministerialin e NATO në Bruksel

Foto Galeri

Ministrja e Mbrojtjes, znj. Mimi Kodheli, mori pjesë në takimin e ministerialit të zhvilluar sot në Bruksel. Ky ishte takimi i parë i ministrave të Mbrojtjes së vendeve aleate, që pas Samitit të Uellsit, në shtatorin e vitit të kaluar. Takimi u hap me diskutimet rreth vendimeve të marra në Uells dhe me shikimin drejt Samitit të Varshavës në 2016, për t’u fokusuar më tutje me planet e veprimit për gatishmërinë.

Një çështje e rëndësishme që u diskutua ishte komisioni NATO - Gjeorgji, ku i pranishëm ishte edhe ministri gjeorgjian i Mbrojtjes. Gjatë këtij sesioni u diskutua mbi kontributin e madh që po jep aktualisht Gjeorgjia në “Resolute Support Mission” në Afganistan, si kontribuesi i dytë më i madh joanëtar. Shqipëria u angazhua se do të jetë e pranishme në misionin e NATO në Gjeorgji.

Gjendja e krijuar në lindje dhe jug të kufijve të Aleancës, ishte tema tjetër e diskutimeve gjatë këtij ministeriali. Zhvillimet politiko - ushtarake në Rusi dhe Lindjen e Mesme kërcënojnë në mënyrë të vazhdueshme sigurinë e vendeve anëtare. Si rrjedhojë përforcimi i masave të marra gjatë Samitit të Uellsit është e vetmja përgjigje e NATO.

Ministrja e Mbrojtjes znj. Kodheli, në fjalën e saj, rikonfirmoi mbështetjen e palëkundur dhe të menjëhershme të Shqipërisë ndaj të gjitha kërkesave të NATO. Ne jemi këtu për t’u përgjigjur vendimmarrjeve politiko - ushtarake të Aleancës. Ajo siguroi që Shqipëria po ndërmerr hapa të rëndësishëm në rritjen e kapaciteteve operative të Forcave të Armatosura për të rritur aftësinë për t’u përgjigjur situatave të ndryshme dhe për t’i ardhur në ndihmë Aleancës. Gjithashtu, bëri të sigurtë që, Shqipëria i njeh Ukrainës dhe Gjeorgjisë kufijtë që njeh NATO dhe OKB.