Ministrja Kodheli në Ministerialin e NATO në Bruksel

Foto Galeri

Ministrja e Mbrojtjes, znj. Mimi Kodheli, merr pjesë në punimet e Ministerialit të Mbrojtjes që po zhvillohet në Bruksel. Në këtë ministerial do të diskutohen tema të rëndësishme që kanë të bëjnë me sfidat e Aleancës, si dhe zhvillimet e fundit lidhur me sigurinë dhe mbrojtjen. 

Ministrja e Mbrojtjes Kodheli, në një prononcim për median, e ka vlerësuar këtë ministerial si shumë të rëndësishëm, pasi ai është i dyti mbas Samitit të Uellsit dhe që parapërgatit një Samit tjetër të rëndësishëm, siç është ai i Varshavës që do të mbahet vitin e ardhshëm.

Situata gjeopolitike në mbarë botën, është shprehur znj. Kodheli, është me probleme, e shqetësuar. Në kufijtë NATO ka kërcënime që vijnë nga lindja dhe nga jugu. Europa vazhdon të ketë dhe do të ketë për një kohë të gjatë probleme me refugjatët që vijnë nga të gjitha vendet që kanë konflikt, probleme të tjera që lidhen me mënyrën se si do të menaxhohet situata në Siri, në Libi dhe në Afganistan. Aleanca duhet të jetë e përgatitur si nga pikëpamja strategjike, ashtu dhe nga pikëpamja praktike për një përgjigje sa të shpejtë aq edhe të gjatë në kohë ndaj gjithë këtyre kërcënimeve.

Fondamentalizmi është një problem tjetër me të cilin kufijtë e Aleancës përballen, me të cilat aleatët do të vazhdojnë të përballen, dhe për pasojë edhe Shqipëria, ka theksuar Kodheli. Ky është një moment i rëndësishëm për të marrë vendime të rëndësishme që lidhen me zgjidhjen në mënyrë të drejtë dhe paqësore të të gjitha problemeve, të cilat megjithëse duken të pazgjidhshme për momentin do të jenë pjesë e diskutimeve tona. Zonja Kodheli ka nënvizuar se Shqipëria është përgjigjur dhe do të vazhdojë të jetë në linjën e parë të gjithë përgjigjes pozitive që ne japim në raport me aleatët tanë. Ne do të kemi gati një kompani “deployable”, pra e lëvizshme në një periudhë kohore prej brenda 4-5 ditëve nga momenti kur mund të ketë nevojë për t’iu përgjigjur pozitivisht të gjitha thirrjeve të Aleancës. Ndërkaq, nga viti 2016 deri në vitin 2018 ne do të përgatitemi për këtë dhe do të vazhdojmë me modernizimin e Forcës tonë të Armatosur, për të qenë në të njëjtin nivel me aleatët tanë me qëllim rritjen e sigurisë, jo vetëm të vendit, jo vetëm të rajonit, por dhe të sigurisë mbarë botërore.

Më tej, ministrja Kodheli theksoi se Shqipëria do të vazhdojë të jetë pjesë e vendimmarrjes. Ne do të mbështesim dhe jemi fuqimisht të mbështetur nga aleati dhe partneri ynë kryesor SHBA, por njëkohësisht kemi një mbështetje të madhe nga vendet e Mesdheut, vendet e rajonit, sidomos vende të një partneriteti të rëndësishëm siç janë Italia, Spanja, Britania e Madhe, Gjermania, vendet e Balltikut, si dhe mbështesim Gjeorgjinë, që ka akoma një rrugë të gjatë për t’u anëtarësuar në NATO, temë kjo e diskutimit të ministerialit të sotëm.