Ministrja Xhaçka në Ministerialin e NATO në Bruksel

8-9 nëntor 2017

Ministeriali i NATO në nivelin e ministrave të Mbrojtjes, që u mbajt në datat 8 dhe 9 nëntor në Bruksel konfirmoi vlerësimin që aleatët e Shqipërisë në NATO kanë për Forcat e Armatosura të vendit tonë. Gjatë dy ditëve të takimit, ministrja e Mbrojtjes Olta Xhaçka u takua me homologë të vendeve anëtarë të NATO.

Gjithashtu, ministrja mbajti fjalën e saj në emër të qeverisë shqiptare, mes të tjerash në takimet e nivelit të lartë si: Takimi i Këshillit të Atlantikut të Veriut, apo Takimi i Ministrave të Mbrojtjes në kuadrin e luftës kundër ISIS, nën udhëheqjen e Shteteve të Bashkuara të Amerikës.

“Ministeriali i NATO dhe takimi me sekretarin e Përgjithshëm, zotin Stoltenberg, por edhe takimet bilaterale me homologët reciprokisht anglez, italian, turk, kanadez, letonez dhe kroat, me të cilët trupat tanë operojnë në disa nga zonat më të nxehta të konfliktit evindentuam vlerësimin e jashtëzakonshëm për kontributin e burrave dhe grave shqiptare nën uniformë, të cilët na bëjnë krenarë me profesionalizmin dhe përkushtimin në të gjitha misionet, por kryesisht në Afganistan dhe detin Egje duke shpëtuar jetë njerëzish, por edhe duke projektuar siguri për vendet e konfliktit, por edhe për gjithë Aleancën. Këto takime ishin një mundësi shumë e mirë për të rikonfirmuar angazhimin e qeverisë shqiptare, për të përmbushur të gjitha detyrimet që Shqipëria ka përkundrejt Aleancës, si dhe detyrimin për të bërë të mundur, që buxheti dedikuar Mbrojtjes të arrijë në masën 2% të PBB deri në vitin 2024. Sa i takon misioneve tona paqeruajtëse, shumë shpejt unë do të vizitoj kontingjentin tonë në Afganistan, për të ndarë me ta ndjesinë e fortë të krenarisë që secili prej nesh ka, për punën e jashtëzakonshme që po bëjnë por edhe për të shprehur mbështetjen e qeverisë shqiptare për çdo efektiv por edhe për familjet e tyre”, - tha ministrja Xhaçka në përfundim të takimit.

Pak javë më parë ministrja Xhaçka, gjatë një takimi në Komandën e Forcës Tokësore, dha lajmin se Shqipëria i është përgjigjur kërkesës së strategjisë së re të presidentit amerikan Donald Trump për Afganistanin, duke shtuar me një togë numrin e ushtarakëve shqiptarë në misionin Resolute Support.

Xhaçka takon homologun britanik Williamson

Në ditën e parë të Ministerialit të Mbrojtjes, që po mbahet në Shtabin e NATO në Bruksel, ministrja Olta Xhaçka u takua me sekretarin e Mbrojtjes të Mbretërisë së Bashkuar, Gavin Willliamson, i emëruar pak ditë më parë në këtë post. Në takimin bilateral, z. Williamson vlerësoi nivelin në rritje të marrëdhënieve dhe bashkëpunimit dy palësh, midis dy vendeve.

“Vlerësojmë kontributin e Shqipërisë në strukturat e NATO dhe veçanërisht atje ku ne jemi shtet drejtues, siç është rasti i Task - Forcës së Gatishmërisë së Lartë. Më lejoni zonja Ministre t’ju shpreh vlerësimin më të lartë për kontributin tuaj të konsiderueshëm, me gjithë kufizimet buxhetore me të cilat përballeni”, - tha ai.

Në aspektin operacional, sekretari britanik i Mbrojtjes, nënvizoi se numri i stërvitjeve të përbashkëta të zhvilluara mes dy vendeve dhe niveli i tyre i kanë shërbyer rritjes së ndërveprimit mes dy ushtrive aleate. Sipas zotit Williamson, Stërvitja e Përbashkët “Albanian Lion”, e planifikuar pë t’u zhvilluar vitin e ardhshëm në Shqipëri është një hap i rëndësishëm në këtë drejtim. Nga ana tjetër, ai konfirmoi angazhimin dhe kontributin e Mbretërisë së Bashkuar në kuadër të BE, NATO dhe aleatëve.

Ministrja Xhaçka, pasi e uroi homologun britanik për detyrën e re, e falënderoi atë për mbështetjen dhe interesin e qeverisë britanike në marrëdhëniet dypalëshe në fushën e Mbrojtjes.

“Edukimi dhe trajnimi i ushtarakëve shqiptarë janë boshti kryesor i bashkëpunimit mes nesh. Numri në rritje i njerëzve tanë në uniformë, të arsimuar në institucionet tuaja, apo rihapja e Zyrës së Atasheut Ushtarak britanik në Tiranë, si tregues i vlerësimit të rolit të Shqipërisë në rajon, janë hapa që do të pasohen nga të tjerë në të ardhmen”, - deklaroi mes të tjerash ministrja Xhaçka.