NATO: Misioni i “Orikut” në Egje, moment i rëndësishëm për Forcat Detare shqiptare

24 nëntor 2017

Misionit të anijes patrulluese të forcës detare shqiptare “Oriku”, e cila ishte pjesë e operacionit të NATO-s, “Sea Guardian”, i është dedikuar një shkrim në faqen zyrtare të NATO-s.
Ajo që vihet re në këtë artikull është vlerësimi dhe profesionalizmi i arritur nga ekuipazhi i anijes gjatë këtij misioni, i cili ka përfunduar me sukses turin 1-vjeçar në operacionin e NATO-s, në Egje.

Në shkrim theksohet gjithashtu se, kjo shënon një moment të rëndësishëm në pjesëmarrjen e parë të Forcave Detare shqiptare në një operacion të NATO-s.

Anija “Oriku” me një ekuipazh prej 21 anëtarësh kishte mision monitorimin dhe patrullimin në ujërat ndërmjet Turqisë dhe Greqisë, duke mbështetur përpjekjet ndërkombëtare për të frenuar trafikimin e qenieve njerëzore. Anija patrulluese “Oriku”, gjatë misionit të saj 1-vjeçar ka shpëtuar rreth 1 mijë jetë njerëzish.

Shqipëria do të zgjasë me një vit qëndrimin e saj në detin Egje, dhe së shpejti drejt operacionit do të niset anija “Butrinti” me 17 anëtarë të ekuipazhit. Kjo anije, për herë të parë do të jetë e pajisur me armatim, një risi kjo në anijet shqiptare të patrullimit. Në kontingjentin e fundit në Egje, pjesë e ekuipazhit kanë qenë edhe dy zonja në uniformë.

Më poshtë lidhja me lajmin në faqen zyrtare të NATO-s:

https://www.nato.int/cps/en/natohq/news_149211.htm?selectedLocale=en