Në mjediset e “Hotel Tirana International” ka nisur punimet Konferenca e NATO për Resurset për vitin 2014. Qëllimi i kësaj konference është të mbështesë dhe të rrisë besimin në përdorimin e fondeve të përbashkëta, të krijojë njohje, mirëkuptim dhe përkrahje për punën në vazhdimësi të zyrave qendrore të NATO dhe gjithashtu të promovojë rritjen e bashkëpunimit efektiv mes pikëpamjeve dhe shqetësimeve të ndryshme të shteteve anëtare.
Në hapjen e konferencës ishin të pranishëm ministrja e Mbrojtjes, znj. Mimi Kodheli, shefi i Shtabit të Përgjithshëm i FA, gjeneralmajor Jeronim Bazo, zëvendësshefi i Shtabit të Komandës së Aleancës për Transformim (ACT), gjeneralmajor Salih Sevil, gjeneralmajor Albert Husniaux, shefi i Shkencës së NATO, si dhe përfaqësues ushtarakë e civilë nga vendet anëtare të NATO dhe vendet partnere.
Ministrja e Mbrojtjes, znj. Mimi Kodheli, duke përshëndetur konferencën theksoi:
Është nderi im dhe nderi i të gjithë neve që të jemi vendi pritës i Konferencës të Katërt të Resurseve të NATO në Shqipëri. Ky event përkon me 5-vjetorin e anëtarësimit të Shqipërisë në NATO. Ky aktivitet përkon gjithashtu me zhvillimet më të fundit në fushën e marrëdhënieve ndërkombëtare.
Qysh nga fundi i Luftës së Ftohtë, ne kemi qenë dëshmitarë të një bote që ndryshon me hapa të shpejtë, në aspektin politik, ekonomik dhe gjeopolitik. Ne po përballemi me kërcënime të reja ndaj sigurisë dhe stabilitetit global dhe për rrjedhojë me një nevojë reale të NATO për të ndryshuar. Forcat e NATO kanë pësuar një transformim të jashtëzakonshëm, por Aleanca duhet të investojë ende në përmirësimin e kapaciteteve për t’u përballur me rreziqe dhe sfida si terrorizmi, pirateria, paqëndrueshmëria rajonale, sulmet raketore dhe ato kibernetike.
Unë jam e bindur se kjo konferencë ka qenë mjaft frytdhënëse në të kaluarën, pasi jo vetëm që ofron një forum për të reflektuar mbi punën që është arritur, por gjithashtu diskuton çështje që do të ndikojnë komunitetin e burimeve në periudhën afatshkurtër. Si e tillë, unë shpresoj që kjo konferencë do të kontribuojë në ecurinë drejt Samitit të Uellsit këtë vit. Shumë prej aleatëve tanë janë prekur nga kriza ekonomike. Ndonëse disa prej ekonomive të aleatëve tanë po rimëkëmben, jo të gjithë ne kemi të njëjtin hap të rimëkëmbjes. Shumica e vendeve kanë pasur reduktime të resurseve që janë dhënë për shpenzime qeveritare dhe ndikimi në shpenzimet e Mbrojtjes ka gjasa që do të zgjasë.
Ne besojmë fuqimisht tek ndarja e drejtë e barrës dhe tek një sfidë e arsyeshme sa i përket objektivave që do të caktohen dhe pranohen si pjesë e Procesit të Planifikimit të Mbrojtjes së NATO. Qeveritë do të duhet të vendosin prioritete në shpenzimin e fondeve publike dhe shpenzimet për buxhetin e Mbrojtjes duhet të konkurrojnë me shpenzimet për arsimimin, luftën kundër papunësisë, kujdesin mjekësor si dhe shërbimet e tjera publike.
Shqipëria iu bashkua Aleancës vetëm 5 vjet më parë dhe ka bërë përparim të dukshëm si pjesë e procesit tonë të integrimit, i cili u finalizua vitin e kaluar. Ky vit do të shënojë një vit të rëndësishëm për Forcat tona të Armatosura, ne do të angazhohemi në finalizimin e Strategjisë Kombëtare të Sigurisë, përpilimin e Strategjisë Ushtarake, Planit Afatgjatë të Zhvillimit të Forcave të Armatosura dhe së fundi, por jo më pak e rëndësishme, rishikimin e strukturës së Forcave të Armatosura. Reformat strukturore dhe lufta kundër korrupsionit janë objektivat tona kryesore. Këto përpjekje synojnë një administratë më efikase, funksionale dhe të aftë dhe një organizim të Mbrojtjes të aftë për misionin e saj të mbrojtjes kolektive dhe mbështetjen e emergjencave civile.
Sikurse shumë prej jush, ne përballemi me zgjedhje të vështira kur diskutojmë mbajtjen e kapaciteteve ekzistuese, prokurimin e kapaciteteve të reja dhe modernizmin e forcave tona. Çështje të tilla si:
• Jetëgjatësia ekonomike e kapaciteteve ekzistuese,
• Kostot e kapacitetit të ri sa i përket investimit, kostove vjetore të mirëmbajtjes dhe personelit të nevojshëm.
• Kapacitetet përballuese financiare brenda buxheteve tona dhe planit afatmesëm,
• Strategjia më e mirë e investimeve,
• Përfitimet industriale dhe punësimi,
• Efiçenca në përdorimin e parave të taksapaguesve.
Unë besoj se ne jemi të aftë të zhvillojmë zgjidhje novatore për shumicën e çështjeve të ngritura. Cikli i jetës ose metodat e kostimit gjatë saj, ndarja e përgjegjësive dhe grupimi i aseteve, bashkëpunimi midis kombeve sovrane të Aleancës, udhëheqja e qartë politike mbi prioritetet që përputhen me kapacitetet dhe burimet e kërkuara, dimensioni kohor dhe specializimi, mund të lehtësojnë barrën e burimeve të Aleancës në tërësi dhe për secilin vend aleat në veçanti.
Aktualisht, ne po zbatojmë një program përditësimi të pajisjeve për forcat tona, teksa kërkojmë të përfitojmë sa më shumë kapacitete nga burimet që kemi në dispozicion.
Unë mendoj se së bashku mund të arrijmë efikasitetin dhe t’ia dalim mbanë në disa fusha. Stërvitja është një ndër fushat ku ne mund të arrijmë ekonominë e shkallës. Disa prej nesh nuk mund të përballojnë ngritjen e stërvitjes së specializuar për çdo aspekt të kërkesave tona stërvitore. Duhet të jemi të aftë të dërgojmë ushtarakët tanë në NATO ose në strukturat trajnuese të aleatëve, apo edhe të vendeve partnere. Kjo do të sillte kursime për vendet që dërgojnë personel dhe qendrat e ekselencës, si dhe specializim në një fushë specifike të institucioneve arsimore pritëse.
Ne përqafojmë idenë e “Smart Defence” dhe iniciativën e Forcave të Lidhura. Jemi të angazhuar në një numër projektesh të “Smart Defence” dhe kemi shpresa të mëdha për një program efikas dhe efektiv për trajnimin individual e kolektiv, si dhe për stërvitjet.
Dhe së fundi, duke ju uruar një konferencë të suksesshme, do të doja të theksoja rëndësinë e këtij aktiviteti për sigurimin e një mundësie unike për vendimmarrësit kryesorë kombëtarë në të gjithë fushat e resurseve, për të pasur një pasqyrë të vlefshme të arritjeve dhe sfidave, si dhe për punën e kryer deri më tani jo vetëm brenda Komuniteteve të Resursave të NATO, por edhe në një kontekst më të gjerë.
Gjithashtu, ky aktivitet ofron një mundësi të shkëlqyer për një shkëmbim të sinqertë pikëpamjesh, sqarime të qëndrimeve dhe identifikimin e sfidave dhe rreziqeve potenciale që kemi përpara.
Faleminderit, ju uroj konferencë të frytshme dhe qëndrim të këndshëm në Tiranë.
Më pas punimet e konferencës kanë vijuar me seksione, ku janë prezantuar tema të ndryshme si: Nga dislokimi te dislokimet; Operacionet në të ardhmen; Detyrat kryesore dhe kapacitetet thelbësore përfshirë strukturat e forcës; Mbrojtja kibernetike, inteligjenca e përbashkët, mbikëqyrja dhe zbulimi; edukimi, trajnimi, ushtrimet, vlerësimet dhe iniciativat për Forcat e Përbashkëta; Një vizion i ri për financime të përbashkëta në NATO etj.
Konferenca e NATO për Resurset për vitin 2014 mbyll punimet me 28 mars 2014.
