Shqipëria, 5 vjet në NATO

Foto Galeri

Në sheshin kryesor të Ministrisë së Mbrojtjes është zhvilluar sot një ceremoni e veçantë me rastin e 5-vjetorit të pranimit të Shqipërisë në NATO. Në këtë ditë jubilare ishin të pranishëm: kryeministri i Republikës së Shqipërisë, z. Edi Rama, ministrja e Mbrojtjes, znj. Mimi Kodheli, ministri i Jashtëm, z. Ditmir Bushati, shefi i Shtabit të Përgjithshëm të FA gjeneralmajor Jeronim Bazo, ish-ministra të Mbrojtjes, deputetë të Kuvendit të Shqipërisë, gjeneralë, drejtorë dhe ushtarakë të tjerë të lartë të Ministrisë së Mbrojtjes, Shtabit të Përgjithshëm dhe Forcave të Armatosura. Gjithashtu morën pjesë ambasadorë dhe atashe ushtarakë të vendeve anëtare të NATO dhe vendeve partnere, si dhe mjaft të ftuar të tjerë.

Fjalën e hapjes së ceremonisë së 5-vjetorit të anëtarësimit në NATO e mbajti ministrja e Mbrojtjes, znj. Mimi Kodheli. Në fjalën e saj znj. Kodheli tha se, është nder dhe privilegj për mua t’ju drejtohem sot në përvjetorin e 5-të të anëtarësimit të Shqipërisë në Aleancën e Atlantikut të Veriut. Pesë vite janë një periudhë relativisht e shkurtër për historinë 65-vjeçare të NATO, por pikërisht sot është e rëndësishme të përmend faktin se vendi ynë menjëherë pas ndryshimit të sistemit politik, shprehu vullnetin për t’u rilidhur me botën euroatlantike.
Me tej, ministrja Kodheli ka folur për rrugën e gjatë të Shqipërisë drejt anëtarësimit në NATO, duke përmendur pranimin si anëtare e Këshillit për Bashkëpunim të Atlantikut të Veriut në qershor 1992, vizitën në vendin tonë të sekretarit të Përgjithshëm të NATO, Manfred Wörner, përfshirjen në nismën e Partneritetit për Paqe, bashkëpunimin e shkëlqyer me strukturat aleate të NATO gjatë periudhës para anëtarësimit. Me këtë rast ka theksuar ministrja Kodheli, gjej rastin të falënderoj veteranët tanë të misioneve të asaj periudhe në Bosnjë Hercegovinë, Irak, Afganistan, Çad etj.

Duke folur për rëndësinë e anëtarësimit të Shqipërisë në NATO, ministrja Kodheli u shpreh se “nuk është aspak e vështirë për ne si shqiptarë, që NATO ta cilësojmë si një ‘lidhje bese’ midis miqsh të nderuar, të vendosur për të mbrojtur njëri-tjetrin, në të drejtën për të jetuar në paqe dhe prosperitet. Ndaj ne jemi të vendosur të mbajmë e lartësojmë rolin tonë si anëtarë të kësaj aleance. Ne do të zbatojmë me vendosmëri reformat e nevojshme për të rivitalizuar ushtrinë dhe institucionet nën varësinë e Ministrisë së Mbrojtjes, me qëllim për t’i vendosur ato në standardet e organeve homologe të vendeve aleate në NATO”. Sot pas dy dekadash, ka vijuar më tej ministrja Kodheli, Shqipëria është anëtare me të drejta të plota e NATO dhe Forcat tona të Armatosura janë të angazhuara aktivisht në partneritet të ngushtë me aleatët tanë për të siguruar paqen dhe integritetin e vendit, sigurinë e rajonit, të Aleancës, madje duke kontribuar për paqen dhe sigurinë globale. “Kjo datë për vendin tonë, popullin tonë, gjithë bashkëkombësit tanë do të mbetet në ndërgjegje si ngjarja që na ribashkoi plotësisht me vlerat dhe parimet euroatlantike të lirisë, demokracisë dhe progresit”, ka nënvizuar znj. Kodheli.

Në përfundim të fjalës së saj ministrja e Mbrojtjes, znj. Mimi Kodheli shprehu mirënjohjen e saj për mbështetjen e aleatit të madh të Shqipërisë, SHBA, si dhe falënderoi të gjithë aleatët e Shqipërisë në NATO për mbështetjen dhe bashkëpunimin e tyre në kuadrin e kësaj ëndrre të madhe shqiptare.

Kryeministri i Shqipërisë, z. Edi Rama, në përshëndetjen e tij theksoi se, po mbushen 5 vjet që historia e Shqipërisë është pasuruar me një ndër datat më të rëndësishme të saj. Anëtarësimi i vendit tonë në NATO, më 1 prill 2009, shënon pa dyshim një ndër ato ngjarje që historia i numëron për rëndësinë e tyre krejt të veçantë. Me këtë rast kryeministri Rama shprehu mirënjohjen për të gjithë ata që punuan për anëtarësimin e Shqipërisë në NATO, duke nënvizuar sidomos mbështetjen e aleatit kryesor, Shteteve të Bashkuara të Amerikës dhe të gjithë aleatëve dhe partnerëve të tjerë. “Mirënjohje ndaj gjithë atyre që ndihmuan në këtë arritje unike. Mirënjohje popullit shqiptar, Forcave të Armatosura, administratës, shoqërisë civile, radhët e politikës pa dallim, që realizuan reformat, që bënë të mundur anëtarësimin në NATO. Mirënjohja ndaj SHBA është e pashmangshme sa herë që ne do të gëzojmë ditë dhe data si kjo e sotmja, apo do të reflektojnë dhe do të veprojnë për çështje të ekzistencës kombëtare”, u shpreh kryeministri Rama. Më tej në fjalën e tij kryeministri Rama u shpreh se prioritet i qeverisë shqiptare mbetet rritja e prestigjit të vendit tonë në NATO, Evropë por edhe në botë.

Në mbyllje të ceremonisë, nga Truproja e Nderit e Forcave të Armatosura në nderim të kësaj dite jubilare u realizuan disa demonstrime, ndërsa në qiellin mbi kuadratet e rreshtuara të FA shqiptare fluturuan helikopterët CUGAR të Forcave Ajrore.