Ministrja Kodheli: Ne do t’i kthejmë dinjitetin e munguar Forcave të Armatosura dhe nuk do të lejojmë që deklarata për konsum dhe përfitim politik të dëmtojnë imazhin e ri që ne po krijojmë.
Ministrja e Mbrojtje, znj. Mimi Kodheli ka marrë pjesë në konferencën ndërkombëtare "5 vjet anëtarësim në NATO: Impakti kombëtar-rajonal dhe sfidat e ardhshme". Kjo konferencë organizohet nga Instituti Shqiptar për Studime Ndërkombëtare. Ishin të pranishëm gjithashtu: ambasadori SHBA në Tiranë, z. Alexander Arvizu, shefi i Shtabit të Përgjithshëm i FA, gjeneralmajor Jeronim Bazo, kryetari i Partisë Demokratike, z. Lulzim Basha, diplomatë, studiues, përfaqësues të botës akademike, si dhe mjaft të ftuar të tjerë.
Ministrja e Mbrojtjes, znj. Mimi Kodheli, duke marrë fjalën ka shprehur vlerësimin e saj për Institutin Shqiptar të Studimeve Ndërkombëtare për organizimin e kësaj konference, e cila, nënvizoi ajo, vjen në vijim të një sërë veprimtarish të organizuara me rastin e 5-vjetorit të anëtarësimit të Shqipërisë në NATO. “Nuk ka asnjë dyshim se anëtarësimi në NATO, ishte një arritje historike e Shqipërisë në rrugën e saj, duke lënë pas izolimin e gjatë dhe të imponuar.
Vizioni ynë për ushtrinë do të mbështetet vetëm e vetëm, mbi kritere profesionale dhe në integritetin moral. Ne do t’i kthejmë dinjitetin e munguar Forcave te Armatosura dhe nuk do të lejojmë që deklarata për konsum dhe përfitim politik të dëmtojmë imazhin e ri qe ne po krijojmë.
Shqipëria dëshmoi se ishte një partner i besueshëm i Aleancës, duke ndërmarrë reforma në një spektër të gjerë që shkonin tej FA, të cilat padyshim janë shndërruar sot në urën e sigurtë që lidh Shqipërinë me NATO”.
Me këtë rast ministrja Kodheli ka shprehur mirënjohjen e thellë të saj dhe të qeverisë për gjitha vendet mike dhe aleate të cilët kanë mbështetur që në hapat e para integrimin e Shqipërisë në NATO.
Ndërsa ambasadori i SHBA, z. Alexander Arvizu në fjalën e tij u shpreh: “Sa i përket reformave të Mbrojtjes, Shtetet e Bashkuara të Amerikës vlerësojnë se përpjekjet e ministres Kodheli për kryerjen reformave dhe luftën kundër korrupsionit kanë të thella dhe rezultative. SHBA inkurajojnë vijimësinë e këtyre përpjekjeve. Në të njëjtën kohë pranojmë faktin se kontributi më afatgjatë në Reformën e Mbrojtjes është forcimi i themeleve të një force moderne, të lëvizshme dhe kompatibël me NATO. Kjo gjë kërkon metoda më të konsoliduara trajnimi, prokurimi dhe rekrutimi cilësor të personelit", - u shpreh ambasadori Arvizu.
