Shqipëria në NATO Ministrja e Mbrojtjes Mimi Kodheli takon zëvendësasistenten e sekretarit të Mbrojtjes së SHBA, Evelyn N. Farkas
Ministrja e Mbrojtjes, znj. Mimi Kodheli, ndodhet në Bruksel ku po merr pjesë në Ministerialin e radhës të ministrave të Mbrojtjes të vendeve të NATO.
Gjatë ditës së sotme, znj. Kodheli pati një takim kokë me kokë me zëvendësasistenten e sekretarit të Mbrojtjes së Shteteve të Bashkuara të Amerikës për Rusinë, Ukrainën dhe Euroazinë, znj. Evelyn N. Farkas. Gjatë këtij takimi znj. Kodheli e njohu znj. Farkas me reformat aktuale në fushën e Mbrojtjes dhe në Forcat e Armatosura, siç janë propozimet e fundit për përmirësimin e kuadrit ligjor. Në këtë pikë ajo u ndal gjithashtu edhe tek angazhimi i Ministrisë së Mbrojtjes në luftën kundër korrupsionit dhe në ristrukturimin e Forcave të Armatosura.
Të dy zyrtaret e larta, u ndalën tek çështje të rëndësishme të bashkëpunimit dypalësh dhe mundësinë e thellimit të mëtejshëm të tyre. Në këtë pikë u diskutua veçanërisht kërkesa për asistencë ligjore e bërë nga ministrja Kodheli, për çështje që kanë të bëjnë me luftën kundër korrupsionit.
Znj. Kodheli dhe znj. Farkas diskutuan për situatën aktuale në Ukrainë, që është edhe tema kryesore e këtij Ministeriali dhe masat që NATO po ndërmerr për të siguruar aleatët.
Zëvendësasistentja e sekretarit amerikan të Mbrojtjes, Farkas, theksoi se SHBA mbështet qeverinë shqiptare dhe Ministrinë e Mbrojtjes në reformat që ka ndërmarrë, si dhe në angazhimet e saj në kuadër të NATO, duke i vlerësuar ato tejet pozitive.
