Ministri Peleshi në Komandën e NATO në Napoli: Shqipëria shton trupat në KFOR

 Fotogaleria

Ministri i Mbrojtjes z. Niko Peleshi, në kuadër të zhvillimit të një vizite zyrtare në Republikën e Italisë, zhvilloi një vizitë në Komandën e Forcës së Bashkuar në Napoli (JFCNP), ku u prit nga komandanti i kësaj komande, admiral Robert Burke.

Pasi i uroi mirëseardhjen, admiral Burke e njohu ministrin Peleshi me disa prej detyrave të komandës që ai drejton dhe fokusin e pati tek roli dhe përgjegjësitë që kjo komandë ka në rajonin e Ballkanit Perëndimor. Ai vlerësoi maksimalisht kontributin e FARSH në misionet dhe operacionet e drejtuara nga NATO, si dhe vuri theksin në rolin konstruktiv që vendi ynë luan për stabilitetin dhe bashkëpunimin rajonal të vendeve të Ballkanit Perëndimor. Veçanërisht, admiral Burke, u ndal në ecurinë e misionit të NATO-s në Kosovë (KFOR), ku vlerësoi kontributin e personelit të FA në këtë mision, si dhe në kuadër të operacionit “Allied Solace”.

Nga ana e tij, ministri Peleshi falënderoi admiral Burke për mikpritjen dhe e përgëzoi atë për lidershipin e treguar në drejtimin e kësaj komande, e cila është e një rëndësie të veçantë për shkak të rolit që ka në rajonin tonë.

Më tej, zoti Peleshi diskutoi me admiral Burke mbi zhvillimet e fundit në krahun lindor të Aleancës dhe vuri në dukje lidhjen që kanë veprimet aktuale të Rusisë në dhe përreth Ukrainës, me aktivitete hibride që Rusia zhvillon në rajonin e Ballkanit Perëndimor. Për këtë, ministri Peleshi kërkoi vëmendje të shtuar të Komandës së Forcës së Bashkuar në rajonin tonë, për të pamundësuar kështu ndikimin dhe influencën e aktorëve dashakeqës në rajon.

Gjithashtu, zoti Peleshi u ndal në zhvillimet në Kosovë ku theksoi rëndësinë kombëtare që ky vend ka për Shqipërinë. Ai vuri në dukje mbështetjen e vazhdueshme që Shqipëria jep për Kosovën në çdo fushë dhe u ndal në zhvillimet që ndodhin shpesh në kufirin Kosovë - Serbi, ku ka reagime joproporcioanle nga Serbia. Këto reagime janë të papranueshme dhe duhet të adresohen në radhë të parë politikisht nga Bashkimi Evropian dhe NATO, por edhe me veprime dhe qëndrime konkrete nga misioni i NATO në Kosovë (KFOR).

Ministri Peleshi e siguroi admiral Burke për mbështetjen e vazhdueshme të Shqipërisë për misionin KFOR dhe e informoi atë mbi rritjen e kontributit të FARSH në këtë mision, duke filluar nga muaji shkurt i këtij viti.

Në përfundim të kësaj vizite, ministri Peleshi pati një takim me personelin shqiptar që shërben në këtë komandë, të cilët i falënderoi për punën e tyre, profesionalizmin dhe përfaqësimin dinjitoz, duke dëshmuar për të disatën herë se ushtarakët shqiptarë janë “ambasadorët” më të mirë të vendit tonë në përçimin dhe promovimin e vlerave tona kombëtare.

Komanda e Forcës së Bashkuar në Napoli është struktura nga e cila varet misioni i NATO në Kosovë, KFOR.