26 - 27 shkurt 2014
Ministrat e Mbrojtjes të vendeve anëtare të NATO ranë dakort të mërkurën (më 26 shkurt) të çojnë përpara planet për të përmirësuar ato kapacitete të Mbrojtjes që janë parësore përsa i përket sfidave të ardhme mbi Sigurinë. Sekretari i Përgjithshëm i NATO z.Anders Fogh Rasmussen tha: "Nga operacionet tona përfshirë këtu edhe Libinë e Afganistanin, kemi identifikuar fushat ku kapacitetet tona kanë mangësi, apo që shumë pak vende i kanë ato kapacitete".
Gjatë ditës së parë të punimeve, ministrja e Mbrojtjes, znj. Mimi Kodheli, theksoi edhe një herë angazhimin e Shqipërisë si anëtare e Aleancës në të gjithë dimensionet, në shërbim të sigurisë globale dhe në kuadër të përpjekjeve të përbashkëta për një organizatë sa më të fortë dhe eficente.
***
Po gjatë kësaj dite, ministrja Kodheli, pati një takim me znj. Francesca Tardioli, zëvendësasistente e Sekretarit të Përgjithshëm të NATO.NATO. Ministrja Kodheli u ndal veçanërisht tek reformat e nevojshme në fushën e Mbrojtjes, kërkoi mbështetje për përballimin e emergjencave civile. Znj. Tardioli kërkoi një vlerësim paraprak për nevojat që ka Shqipëria dhe garantoi ndihmë nga NATO.
Për më tepër ndiqni linkun:Ministrja e Mbrojtjes, Kodheli, merr pjesë në Ministerialin e NATO në Bruksel
27 shkurt 2014
Në ditën e dytë, ministrja Kodheli drejtoi Ministerialin e Mbrojtjes SHBA-Karta e Adriatikut (A5), pasi vendi ynë ka marrë Presidencën e kësaj Iniciative për vitin 2014.
Në fjalën e saj të hapjes, ministrja e Mbrojtjes Kodheli shprehu kënaqësinë për pjesëmarrjen e të gjithë ministrave të Mbrojtjes të vendeve anëtare të Kartës së Adriatikut, si dhe për organizimin e këtij takimi në Selinë e NATO, e cila mbart një simbolikë të veçantë, që lidhet ngushtë me një ndër parimet themelore të Iniciativës së A-5: integrimi euroatlantik i vendeve të rajonit.
Gjatë fjalës së saj, ministrja e Mbrojtjes Kodheli renditi prioritet që do të ketë iniciativa SHBA-Karta e Adriatikut gjatë kryesimit nga vendi ynë, duke theksuar forcimin i bashkëpunimit rajonal për t’iu përgjigjur më mirë nevojave dhe objektivave kombëtare të vendeve anëtare; mbështetjen e politikës së NATO së “Dyerve të Hapura” për anëtarësimin e vendeve të tjera të rajonit; angazhimin e mundshëm në Afganistan pas vitit 2014 në operacione të drejtuara nga NATO; promovimin e Qendrave Rajonale të Trajnimit, etj.
Pas përfundimit të takimit, Kodheli duke iu përgjigjur interesimit të gazetarëve lidhur me këtë takim ka deklaruar se, Shqipëria ka kryesinë e Kartës së Adriatikut dhe është e rëndësishme të ndajë me publikun shqiptar katër momente: mbështetjen e politikës së dyerve të hapura që Shqipëria ka në raport me fqinjët apo me të gjithë ata që aderojnë të bëhen nesër vende anëtare të NATO; bashkëpunimin më të ngushtë që duhet të kemi për emergjencat civile; ndihma që Shqipëria duhet t’i japë vendeve fqinjë për rritjen e mbështetjes dhe transformimit që këto vende duhet të kenë në rrugën e tyre relativisht të gjatë për në NATO, por jo të pamundur; rritjen e kapaciteteve operuese, e cila do të mundësojë bashkëpunimin midis operacioneve që forcat e NATO udhëheqin me Forcat e Armatosura të Malit të Zi, Maqedonisë, Bosnje-Hercegovinës, Kroacisë dhe Shqipërisë, si pjesë të A5.
Për më tepër ndiqni linkun:Ministrja Kodheli drejton Ministerialin e Mbrojtjes SHBA-Karta e Adriatikut (A5)
