Newsroom Ministrja Kodheli drejton Ministerialin e Mbrojtjes SHBA-Karta e Adriatikut (A5) në Bruksel
Në kuadër të pjesëmarrjes në takimin e ministrave të Mbrojtjes së NATO, që po organizohet në Bruksel në datat 26-27 shkurt 2014, ministrja e Mbrojtjes, znj. Mimi Kodheli, mori pjesë dhe në Ministerialin e SHBA-Karta e Adriatikut (A-5). Ky ministerial u drejtua nga znj. Kodheli, pasi vendi ynë ka marrë Presidencën e kësaj Iniciative për vitin 2014.
Në fjalën e saj të hapjes, ministrja e Mbrojtjes Kodheli shprehu kënaqësinë për pjesëmarrjen e të gjithë ministrave të Mbrojtjes të vendeve anëtare të Kartës së Adriatikut, si dhe për organizimin e këtij takimi në Selinë e NATO, e cila mbart një simbolikë të veçantë, që lidhet ngushtë me një ndër parimet themelore të Iniciativës së A-5: integrimi euroatlantik i vendeve të rajonit.
Gjatë fjalës së saj, ministrja e Mbrojtjes Kodheli renditi prioritet që do të ketë iniciativa SHBA-Karta e Adriatikut gjatë kryesimit nga vendi ynë, duke theksuar forcimin i bashkëpunimit rajonal për t’iu përgjigjur më mirë nevojave dhe objektivave kombëtare të vendeve anëtare; mbështetjen e politikës së NATO së “Dyerve të Hapura” për anëtarësimin e vendeve të tjera të rajonit; angazhimin e mundshëm në Afganistan pas vitit 2014 në operacione të drejtuara nga NATO; promovimin e Qendrave Rajonale të Trajnimit, etj.
Ministrja e Mbrojtjes Kodheli gjithashtu u shpreh se, Forcat e Armatosura shqiptare prej një kohe të gjatë janë angazhuar dhe do të vazhdojnë angazhimin e tyre në operacione të drejtuara nga NATO. Në vijim të fjalës së saj, znj. Kodheli ka theksuar se, bashkëpunimi rajonal duhet të orientohet në konceptin e “Smart Defence”, si dhe në përdorimin e aseteve të përbashkëta të mbrojtjes në rast emergjencash. Ministrja Kodheli i cilësoi stërvitjet e përbashkëta si një mjet i mirë për të rritur e forcuar më tej bashkëpunimin ushtarak në rajon e më gjerë, duke përmendur sidomos stërvitjen e përbashkët që do të organizohet në vendin tonë në vitin 2015.
Ministrat e Mbrojtjes konfirmuan dhe njëherë rëndësinë e procesit të integrimit euroatlantik për forcimin e stabilitetit dhe sigurisë në vendet e Europës Juglindore. Në këtë takim një rëndësi të veçantë iu kushtua rolit të Shqipërisë, Kroacisë dhe SHBA, si vende anëtare të NATO, në mbështetjen që po i japin vendeve të tjera pjesëmarrëse në këtë iniciativë në procesin e integrimit në NATO apo struktura të tjera rajonale.
Pas përfundimit të takimit të Kartës së Adriatikut (A5), që u zhvillua në kuadër të Ministerialit të Mbrojtjes të vendeve anëtare të NATO, në Bruksel, ministrja e Mbrojtjes Kodheli duke iu përgjigjur interesimit të gazetarëve lidhur me këtë takim ka deklaruar se, Shqipëria ka kryesinë e Kartës së Adriatikut dhe është e rëndësishme të ndajë me publikun shqiptar katër momente: mbështetjen e politikës së dyerve të hapura që Shqipëria ka në raport me fqinjët apo me të gjithë ata që aderojnë të bëhen nesër vende anëtare të NATO; bashkëpunimin më të ngushtë që ne duhet të kemi për emergjencat civile, i cili padyshim mbas këtij takimi ngrihet në një nivel më intensiv dhe më të lartë; ndihma që Shqipëria duhet t’i japë vendeve fqinjë për rritjen e mbështetjes dhe transformimit që këto vende duhet të kenë në rrugën e tyre relativisht të gjatë për në NATO, por jo të pamundur, absolutisht jo dhe ajo çka është më e rëndësishme, rritja e kapaciteteve operuese, e cila do të mundësojë bashkëpunimin midis operacioneve që forcat e NATO udhëheqin me Forcat e Armatosura të Malit të Zi, Maqedonisë, Bosnje-Hercegovinës, Kroacisë dhe Shqipërisë, si pjesë të A5.
