Ministrja e Mbrojtjes, znj. Mimi Kodheli po merr pjesë në Ministerialin e Mbrojtjes të vendeve anëtare të NATO që po zhvillohet në Bruksel.
Në këtë ministerial do të diskutohen çështje të rëndësishme që lidhen me zhvillimet në NATO si: situata në Ukrainë, ristrukturimi dhe reduktimi, pritjet e Aleancës nga Samiti i NATO që do të zhvillohet në Uells, Angli, më 4-5 shtator 2014; ndërtimi i kapaciteteve të Mbrojtjes; sfidat me të cilat përballet Aleanca në Afganistan, etj.
Përsa i takon situatës në Ukrainë, ministrat e Mbrojtjes të Aleancës, theksuan se NATO do të vijojë të jetë e angazhuar në bashkëpunimin me Ukrainën. Vlerësuan rolin e ushtrisë, e cila nuk u bë pjesë e konfliktit politik të brendshëm, si dhe nënvizuan edhe një herë rëndësinë e proceseve demokratike në një Ukrainë të pavarur, të qëndrueshme dhe të angazhuar në drejtim të sundimit të ligjit
Gjatë ditës së parë të punimeve, ministrja e Mbrojtjes, znj. Mimi Kodheli, theksoi edhe një herë angazhimin e Shqipërisë si anëtare e Aleancës në të gjithë dimensionet, në shërbim të sigurisë globale dhe në kuadër të përpjekjeve të përbashkëta për një organizatë sa më të fortë dhe eficente.
Po sot, ministrja e Mbrojtjes, znj. Mimi Kodheli, pati një takim me znj. Francesca Tardioli, zëvendësasistente e Sekretarit të Përgjithshëm të NATO. Gjatë bisedës tejet të ngrohtë, ministrja Kodheli e njohu znj. Tardioli me zhvillimet më të fundit në Shqipëri, si dhe u ndal veçanërisht tek reformat që janë të nevojshme të ndërmerren në fushën e mbrojtjes. Duke folur për emergjencat civile apo katastrofat natyrore, znj. Kodheli kërkoi mbështetje për përballimin e tyre. Nga ana e saj, znj. Tardioli kërkoi një vlerësim paraprak për nevojat që ka Shqipëria dhe garantoi ndihmë nga NATO. Në këtë kuadër, ministrja Kodheli i bëri me dije znj. Tardioli angazhimin e qeverisë shqiptare në luftën kundër korrupsionit.
Një tjetër çështje në të cilën u ndalën bashkëbisedueset ishte edhe situata politike në Itali. Znj. Tardioli tha se qeveria e re italiane ka një program ambicioz, si reforma elektorale, institucionale apo shmangia e burokracive. Në këtë pikë ajo vlerësoi fort rolin e presidentit italian, z. Giorgio Napolitano, në zgjidhjen e krizës.
Ministeriali i Mbrojtjes të vendeve anëtare të NATO që po zhvillohet në Bruksel i mbyll punimet më 27 shkurt 2014.
