Newsroom FA ndërtojnë urën në Darëzezë, ministrja Xhaçka: Ditë, natë në shërbim të komunitetit
Forcat e Armatosura përfunduan në kohë rekord ndërtimin e një ure “bailey” në fshatin Darëzezë të njësisë administrative Dërmenas në bashkinë e Fierit, duke nxjerrë nga izolimi 1200 banorë të këtij fshati.
Ura e re u ndërtua në më pak se 18 orë dhe zëvendëson urën e shembur nga përmbytjet e ditëve të fundit që përfshinë atë zonë.
Në përfundimin e punimeve të kësaj ure ishte e pranishme edhe ministrja e Mbrojtjes Olta Xhaçka, e cila vlerësoi maksimalisht angazhimin e efektivëve të Forcave të Armatosura dhe bashkëpunimin mes institucioneve.”Menaxhimi i mirë edhe bashkëpunimi me të gjitha institucionet, por kryesisht puna e jashtëzakonshme e djemve të FA, ka qenë garancia për të menaxhuar mirë edhe për ta kontrolluar këtë situatë që mund të kishte qenë shumë më e keqe nga çfarë është sot.”- tha ministrja Xhaçka, e cila nuk la pa përmendur festën e krijimit të ushtrisë kombëtare. “Sot është edhe 105 – vjetori i krijimit të FA dhe në fakt me sakrificën dhe vetëmohimin që i karakterizon përgjithësisht efektivët e FA, nuk janë duke festuar por janë sigurisht në ujë dhe në baltë për t’iu gjendur pranë çdokujt që ka nevojë për ndihmën tonë. Sigurisht që këto janë ditë shumë të vështira dhe janë ditë që të gjithë duhet të jemi të mobilizuar maksimalisht për t’iu ardhur njerëzve në ndihmë. Por unë marr shkas edhe nga kjo datë e shënuar për të përcjellë mirënjohjen time për punën e jashtëzakonshme që bën FA në krah të aleatëve tanë të NATO-s në misione paqeruajtëse kudo nëpër botë. Janë sot në Afganistan, janë në Kosovë, janë në Bosnje dhe Hercegovinë, janë në Letoni, janë në Mali, janë në detin Egje, por edhe në misione të tjera. Marr shkas nga kjo datë për të shprehur mirënjohje dhe falënderim për të gjithë këta efektivë të FA që ndodhen sot këtu për t’i shërbyer komunitetit ditë, natë, deri në normalizimin e kësaj situate. Mirënjohje dhe krenari pafund për gjithsecilin prej jush.”
Duke iu përgjigjur interesit të gazetarëve, ministrja Xhaçka i siguroi ata dhe banorët e Darëzezës se ura e sapondërtuar është plotësisht e sigurt dhe do të mundësojë lëvizjen e mjeteve të rënda.
Ministrja Xhaçka nënvizoi se ndërhyrja në infrastrukturën e dëmtuar për shkak të reshjeve të fundit, mbetet një sfidë për Forcat e Armatosura shqiptare, të cilat gjithashtu kanë ndërmarrë një nismë për grumbullimin dhe shpërndarjen e ndihmave për banorë e prekur nga përmbytjet.
