Newsroom Kthehen në atdhe pas misionit në Kabul e Afganistan kontingjentet "Resolute Support Mission"
Trupat e Kontingjentit VI paqeruajtës të Batalionit të Forcave Speciale dhe Kontingjentit XIII paqeruajtës të Batalionit II të Këmbësorisë që morën pjesë në misionin “Resolute Support Mission” në Kabul, Afganistan janë kthyer në atdhe pas përmbushjes së detyrës.
Ministri i Mbrojtjes, Niko Peleshi u uroi mirëseardhjen efektivëve, përmes një postimi dhe fotove në Facebook.
Ndërsa në ceremoninë e zhvilluar me këtë rast, në mjediset ushtarake të aeroportit të Rinasit morën pjesë zëvendësshefi i Shtabit të Përgjithshëm gjeneralmajor Manushaqe Shehu, komandanti i Forcës Tokësore gjeneral brigade Arben Kingji dhe atasheu ushtarak i Republikës së Turqisë kolonel Kablay.
Në fjalën e tij, komandanti i Forcës Tokësore gjeneral brigade Arben Kingji theksoi: “Nga ky vend ku jemi mbledhur, kemi përcjellë dhe pritur shumë kontingjente ndër vite, por ky i sotmi është më i veçantë. Ju jeni kontingjenti i fundit në misionin paqeruajtës RSM duke përmbyllur një tjetër kapitull historik krenarie të kontributit të Forcës Tokësore në operacionet e mbështetjes së paqes, të udhëhequra nga NATO. Eksperienca e përfituar është një mundësi e shkëlqyer, ku mësimet e nxjerra do t'i përdorim në të ardhmen në trajnim, edukim dhe stërvitje."
Misioni VI i Resolute Support Mission në Kabul është kontingjenti i fundit që shërben në Afganistan.
Forca Tokësore që në fillimet e pjesëmarrjes në misionet ndërkombëtare në Afganistan në 2002 është përfaqësuar në të gjitha komandat rajonale si Herat, Mazar-i- Sharif, Kabul dhe Kandahar.
