Ministrja Kodheli në takimin e ministrave të Mbrojtjes së Europës Juglindore (SEDM)

e enjte, 16 tetor 2014 16:05

Në Ministerialin Gjithëpërfshirës Rajonal që po zhvillohet në Budva të Malit të Zi, ministrja e Mbrojtjes, znj. Mimi Kodheli mori pjesë në takimin e ministrave të Mbrojtjes të Europës Juglindore (South - Eastern Europe Defence Ministerial), SEDM.

Tema kryesore e diskutimit në këtë takim ishte forcimi i bashkëpunimit midis vendeve pjesëmarrëse në këtë nismë në funksion të stabilitetit dhe sigurisë së rajonit përballë zhvillimeve të rëndësishme gjeopolitike.

Ministrja Kodheli në cilësinë e drejtueses së ministerialit SHBA - A5 i vlerësoi konkluzionet e tij të suksesshme dhe shumë të rëndësisshme.

Shqipëria gjeti mbështetjen e SHBA në propozimin që vendet e A5 të mund të marrin pjesë në një mision të atashuar në Resolute Support Mission në Afganistan në përmbushje të detyrimeve të NATO.

Ministrja Kodheli gjatë këtij ministeriali zhvilloi edhe disa takime dypalëshe.

Fillimisht ajo u takua me zëvendësasistenten e sekretarit amerikan të Mbrojtjes për Euro - Azinë,   znj. Evelyn N. Farkas. Zyrtarja e lartë amerikane e garantoi edhe një herë tjetër znj. Kodheli për mbështetjen e padiskutueshme të SHBA në proceset e rëndësishme integruese që Shqipëria ka përpara. Znj. Farkas vlerësoi me nota pozitive rolin e Shqipërisë si faktor stabiliteti në rajon. Gjithashtu, ministrja Kodheli dhe zëvendësasistentja e sekretarit amerikan të Mbrojtjes, znj. Farkas, diskutuan edhe për zhvillimet më të fundit në fushën e Mbrojtjes dhe rrezikun që vjen nga kërcënimet e ndryshme globale. Me këtë rast, znj. Farkas falënderoi ministren Kodheli dhe qeverinë shqiptare për rreshtimin e tyre në krah të aleatëve në luftën kundër ISIS.

Ministrja e Mbrojtjes Kodheli pati një takim me znj. Milica Pejanović - Đurišić, ministre e Mbrojtjes të Malit të Zi. Homologet vlerësuan marrëdhëniet e mira mes dy vendeve tona, sidomos ato në fushën e Mbrojtjes, si dhe nënvizuan rëndësinë e bashkëpunimit rajonal përmes projekteve të përbashkëta.

Ministrja Kodheli pati gjithashtu një takim edhe me ministrin e Forcës së Sigurisë së Kosovës, z. Agim Çeku. Gjatë këtij takimi dy ministrat shkëmbyen mendime rreth zhvillimeve aktuale në fushën e Mbrojtjes, si dhe për çështje të tjera që i shërbejnë forcimit të bashkëpunimit midis dy vendeve tona.
Ministrja Kodheli pati një takim të veçantë edhe me ministrin turk të Mbrojtjes, z. İsmet Yılmaz ku vlerësuan maksimalisht marrëdhëniet mes dy vendeve dhe ushtrive tona, si dhe nënshkruan protokollin e zbatimit për asistencën financiare.