Në kuadër të fushatës së nisur nga Ministria e Mbrojtjes për rekrutimin e 250 ushtarëve/detarëve aktivë në Forcat e Armatosura, ministrja e Mbrojtjes, znj. Mimi Kodheli u ndal sot në Universitetin Politeknik të Tiranës. Të pranishëm në këtë aktivitet ishin: ministrja e Mbrojtjes, znj. Mimi Kodheli, rektori i Universitetit Politeknik të Tiranës, z. Jorgaq Kaçani, komandanti i Forcës Tokësore, gjeneralmajor Zyber Dushku, komandanti i Qendrës së Personel - Rekrutimit, kolonel Leonard Çoku, drejtorë dhe ushtarakë të Ministrisë së Mbrojtjes dhe të Shtabit të Përgjithshëm.
Gjatë fjalës së saj, Ministria Kodheli i ftoi studentët të bëhen pjesë e Forcave të Armatosura, duke sjellë në vëmendje avantazhet që ka ky vendim i tyre. “Është intrigues shkollimi, është intriguese puna, misioni fisnik i shkruajtur me germa të arta në Kushtetutën e Republikës së Shqipërisë. Është e rëndësishme puna që do të bëni nesër në FA. Padyshim është intriguese dhe veshja”, u shpreh Kodheli. Ministrja e Mbrojtjes znj. Kodheli i ftoi studentët të bëhen pjesë e vlerave më të mëdha që një shoqëri ka: dashurinë për atdheun. Një vlerë e cila është shumë e rëndësishme dhe përmbledh shumë fjalë, shumë zemër, shumë histori, por dhe dashurinë për tjetrin, një vlerë universale kjo. Jetojmë në momente të vështira historike, në ambiente ku risku i të qenit përpara një agresioni është më i madh nga ç’duket në jetën tonë të përditshme.
Për ministren e Mbrojtjes ata që do të aplikojnë për të qenë pjesë e Forcave të Armatosura jo vetëm që kanë një kontratë të sigurtë pune, por edhe mundësi të tjera, duke u ndalur tek shkollimi dhe trajnimi në shkollat më të mira në botë. “Gjëja që unë do të garantoja pa pasur frikë se bie në patetizëm është fakti që ju do të gjeni jo vetëm një ambient paqësor, nëse do të vini ta provoni veten, por do të gjeni drejtësi, do të gjeni transparencë, që është shumë e rëndësishme”, theksoi Kodheli.
I pranishëm në këtë aktivitet, komandanti i Forcës Tokësore, gjeneralmajor Zyber Dushku i ftoi të rinjtë të bëhen pjesë e FA dhe të shërbejnë për kombin nën këtë uniformë të dashur dhe të rëndësishme.
Ministria e Mbrojtjes për vitin 2015 do të pranojë në radhët e saj 500 ushtarë/detarë aktiv në FA. Prej këtij kontingjenti, 250 ushtarë/detarë aktiv në fillim të vitit, ndërsa pjesa tjetër në gjashtëmujorin e dytë.
© Ministria e Mbrojtjes 2024 - Të gjitha të drejtat e rezervuara.