Ministria e Mbrojtjes angazhon 1000 forca dhe 76 mjete në funksion të pastrimit të territorit

e shtunë, 08 shkurt 2014 15:45

Foto Galeri

Menjëherë pas vendimit të marrë nga komisioni ndërministror për shpalljen e emergjencës civile për gjendjen e mjedisit, Ministria e Mbrojtjes dhe Shtabi i Përgjithshëm i Forcave të Armatosura u angazhuan në akset nacionale, kryesisht në zonën Lezhë-Shkodër. Që në orët e para të mëngjesit të sotëm efektivët e FA u vendosën në të gjithë territorin e kësaj zone duke pastruar mbetjet. Zëvendësministri i Mbrojtjes, z. Dritan Hila dhe shefi i Shtabit të Përgjithshëm, gjeneral major Jeronim Bazo ndoqën nga afër të gjithë procesin e pastrimit dhe ftuan komunitetin t’i bashkohen kësaj nisme.

Gjeneralmajor Bazo tha se bashkëpunimi civilo-ushtarak është një element mjaft i rëndësishëm që i vjen në ndihmë komunitetit dhe të gjithë shoqerisë shqiptare, e cila vuan shumë nga problemi me mbetjet urbane. “Shqipëria është e të gjithëve, ta mbajmë atë të pastër”, është motoja e kësaj nisme, ndaj dhe të angazhohemi maksimalisht në funksion të këtij qëllimi, nënvizoi gjeneralmajor Jeronim Bazo. Akset kryesore në të cilat ushtria bëri pastrimin e territorit sot ishin: Hani i Hotit- Shkodër; Muriqan-Shkodër; Ura e Bunës-Shirokë; Shkodër-Lezhë-Milot. Forcat e Armatosura në planet e tyre kanë që ky mision të vazhdojë në disa fundjava. Gjatë ditës së sotme nga puna e efektivëve të Forcave të Armatosura janë pastruar 76 km rrugë dhe mbetjet e nxjerra janë transportuar me mjetet e FA për në vendgrumbullimet e tyre.