Ministrja e Mbrojtjes Kodheli vizitë zyrtare në Turqi

e mërkurë, 12 shkurt 2014 13:45

Foto Galeri

Ministrja e Mbrojtjes, znj. Mimi Kodheli, po zhvillon një vizitë zyrtare dyditore në Ankara, Turqi, me ftesë të homologut të saj, ministrit të Mbrojtjes së Turqisë, z. Ismet Yilmaz.
Në takimin që ministrja Kodheli zhvilloi me ministrin e Mbrojtjes së Turqisë, z. Ismet Yilmaz u nënvizua niveli shumë i mirë i marrëdhënieve mes dy vendeve tona, si dhe u diskutua për gjetjen e potencialeve për t’i çuar ato më tej. Ministri turk i Mbrojtjes tha se, Turqia e shikon Shqipërinë si një partnere të rëndësishme dhe aleat të madh të saj. Në këtë kontekst, në emër të qeverisë turke z. Yilmaz siguroi ministren Kodheli për mbështetjen e padiskutueshme të Turqisë për Shqipërinë për marrjen e statusit të vendit kandidat për BE.

Më tej, dy zyrtarët e lartë, duke u ndalur tek marrëdhëniet në fushën e mbrojtjes, vlerësuan bashkëpunimin shumë të mirë mes dy vendeve tona. Në këtë kuadër, në Turqi janë arsimuar dhe kualifikuar 2500 studentë ushtarakë shqiptarë që nga viti 1992 e në vazhdim, ndërsa aktualisht në këtë vend studiojnë 86 të tillë.
Gjithashtu, gjatë këtij takimi dy homologët diskutuan edhe për projekte konkrete bashkëpunimi, duke parë mundësinë e investimeve turke në Aeroportin e Kuçovës apo në Bazën e Pashalimanit.
Ministrja Kodheli e njohu homologun e saj edhe me rolin e Shqipërisë në çështjet rajonale. Ajo është ndalur edhe tek mbledhja e përbashkët e dy qeverive Shqipëri-Kosovë dhe shprehu bindjen se një mbledhje e tillë edhe me qeverinë turke do t’i shërbente jo vetëm dy vendeve tona, por mbarë rajonit.

Në vijim të kësaj vizite, znj. Kodheli u prit në një takim tejet të ngrohtë edhe nga shefi i Shtabit të Përgjithshëm, gjeneral armate Necdet Ozel. Gjenerali Ozel ka nënvizuar fort vullnetin e FA të Turqisë për të mbështetur FA të Shqipërisë në të gjitha nevojat e tyre. Në këto takime, znj. Kodheli kërkoi të gjenden mundësi bashkëpunimi, sidomos në fushën e industrisë ushtarake, duke theksuar se Shqipëria duhet të mbajë patjetër në funksion Uzinat e Poliçanit, Mjekësit apo të Gramshit, si të vetmen mundësi ekonomike për banorët e këtyre zonave.

Më herët, ministrja e Mbrojtjes Kodheli vendosi një kurorë me lule në Mauzoleumin e Mustafa Qemal Ataturkut.