Newsroom Ministrja e Mbrojtjes Kodheli inspekton aksionin e FA për pastrimin e territorit nga mbetjet
Ministrja e Mbrojtjes, znj. Mimi Kodheli, e shoqëruar nga shefi i Shtabit të Përgjithshëm të FA, gjeneralmajor Jeronim Bazo, kanë inspektuar nga afër fazën e dytë të aksionit të Forcave të Armatosura për pastrimin e territorit.
Fillimisht, ata janë ndalur në pikën doganore të Morinës, ku forca të shumta të ushtrisë ishin duke pastruar territorin. Më tej, kanë ndalur përgjatë gjithë akseve rrugore nga Morina deri në Tiranë, ku efektivat e Forcave të Armatosura ishin të angazhuara dhe kanë parë nga afër aksionin e pastrimit të mbetjeve.
Në fjalën e saj, ministrja Kodheli u shpreh se duhet ta mbajmë të pastër Shqipërinë dhe gjendjen mjedisore në të gjithë territorin e vendit e ka cilësuar si Emergjencë Mjedisore. Më tej, ministrja Kodheli theksoi se qeveria ka disponibilitetin maksimal për ta mbajtur të pastër mjedisin.
Në takimet që zhvilloi me disa prej banorëve të zonave, ministrja Kodheli u ka tërhequr vëmendjen atyre dhe u ka kërkuar që ta mbajnë të pastër ambientin në të cilin jetojnë, si dhe u bëri thirrje të gjithëve që të bëhen pjesë e këtij aksioni.
Në këtë aksion janë angazhuar 1000 forca të FA dhe 80 mjete.
Akset kryesore në të cilat Forcat e Armatosura kanë ndërhyrë gjatë ditës së sotme janë: Dogana Morinë-Ura e Drinit Kukës, 20 km; Milot-Rubik, 12 km; Milot-Kukës, 32 km; Kamëz-Vorë, 12.5 km dhe Kashar-Aeroporti i Rinasit, 7 km. Në total janë pastruar 83.5 km rrugë kombëtare dhe mbetjet e nxjerra janë transportuar me mjetet e FA për në vendgrumbullimet e tyre.
