Newsroom Ministrja Kodheli ndjek nga afër fazën e tretë të aksionit të FA për pastrimin e territorit
Ministrja e Mbrojtjes, znj. Mimi Kodheli e shoqëruar nga shefi i Shtabit të Përgjithshëm i FA, gjeneralmajor Jeronim Bazo kanë ndjekur nga afër fazën e tretë të aksionit të pastrimit të territorit nga mbetjet. Gjatë ditës së sotme ato janë ndalur në pikën doganore të Kapshticës ku forcat të shumta të ushtrisë ishin të angazhuara në pastrimin e terriotorit.
Më tej ato janë ndalur në të gjitha akset rrugore nga Kapshtica deri në Tiranë ku kanë parë nga afër punën e FA për pastrimin e mbetjeve.
Në fjalën e saj ministrja Kodheli u shpreh: “Sot është faza e trëtë e një beteje me papastërtinë. Siç e shikoni, si në Morinë ashtu edhe në Kapshticë pamja që shikojmë nuk është aspak dinjitoze”.
Në vijim të fjalës së saj ministrja Kodheli ka theksuar se duhet një bashkëpunim majft i ngushtë me qytetarët, pushtetin lokal dhe biznesin për pastrimin dhe mbajtjen pastër të territorit. Ministrja Kodheli ka falenderuar të gjithë efektivët e Forcave të Armatosura që janë angazhuar në këtë aksion dhe ka vlerësuar maksimalisht sakrificën dhe shembullin e mirë që ato po japin. “Qortim për të gjithë ata që e konsiderojnë mjedisin një gjë të huaj”- u shpreh në përfundim të fjalës së saj ministrja Kodheli.
I pranishëm në aksionin e pastrimit ishte edhe ministri i Mjedisit z. Lefter Koka. Gjatë fjalës së tij ministri Koka ka falenderuar Forcat e Armatosura për punën kolosale që kanë bërë dhe u ka bërë thirrje qytetarëve dhe komunitetit të tregohen më të kujdesshëm dhe ta mbajnë të pastër ambientin në të cilin jetojnë.
Gjatë aksionit pastrimit Forcat e Armatosura kanë gjetur pranë Vorës edhe 3 predha artilerie të kalibrit 85 mm.
Gjatë fazës së tretë të aksionit të pastrimit u angazhuan 1300 efektivë të Forcave të Armatosura dhe 86 mjete. “Aksioni përfshiu pastrimin e akseve rrugore: Aeroporti "Nënë Tereza"- kryqëzimi i Fushë Krujës (10 km); Aksi rrugor Vorë-Porti Durrës (të dy krahët e autostradës, 42 km); Aksi rrugor Elbasan-Prrenjas (47 km); Aksi rrugor Pogradec-Korçë (5 km në Qafë Plloçë); Qafë Thanë-Rrajcë (9 km) dhe Korçë-Kapshticë (30 km). Në total gjatë ditës së sotme janë pastruar 143 km rrugë kombëtare dhe mbetjet e mbledhura janë transportuar me mjete të FA për në vendgrumbullimet e tyre.
