Ministrja e Mbrojtjes, znj. Mimi Kodheli në vijim të vizitës së saj dy ditore në Greqi zhvilloi një takim me homologun e saj, ministrin grek të Mbrojtjes, z. Dimtris Avramopoulos. Në këtë takim u diskutua me tone entuziaste për bashkëpunimin mes dy vendeve tona në fusha të rëndësishme dhe me impakt të madh për qytetarët e të dy vendeve. Temat e diskutuara në këtë takim kishin të bënin me bashkëpunimin në fushën e mbrojtjes, si dhe mbështetjen e padiskutueshme në rrugën e Shqipërisë drejt BE. Të dy palët ndanë të njëjtin mendim që takimi i sotëm i jep një dimension të ri bashkëpunimit mes dy vendeve tona.
Ashtu si kryeministri Samaras, edhe ministri Avramopoulos, shpehu bindjen se nën drejtimin e qeverisë Rama e ardhmja e Shqipërisë është e sigurt. “Është një politikan modern dhe largpamës, është fat për Shqipërinë që ka një politikan të tillë, që i mbishton vlerat e vendit”, - u shpreh Avamopoulos për kryeministrin Rama.
Më pas axhenda e znj. Kodheli vijoi me një takim kokë me kokë me homologun e saj dhe në fund të takimit dhanë së bashku një deklaratë për shtyp. Në deklaratën për mediat, z. Avramopoulos u kujdes të theksojë se ky është një kapitull i ri në bashkëpunimin dypalësh. Sipas tij, bashkëpunimi do të jetë shumë i vlefshëm për ristrukturimin e Forcave të Armatosura të Republikës së Shqipërisë, ku Greqia do të ofrojë të gjithë mbështetjen e saj. “Ky takim është një mesazh paqeje dhe stabiliteti në rajon dhe më gjerë në funksion të fqinjësisë së mirë. Ne do ju mbështesim fuqishëm në rrugën tuaj drejt anëtarësimit në BE”, - tha ministri grek i Mbrojtjes.
Ndërsa ministrja Kodheli, ndër të tjera, theksoi se “Me ministrin Avramopoulos ndamë të njëjtin qëndrim mbi mundësinë për të thelluar më tej marrëdhëniet tona në fushën e mbrojtjes, për ta bërë atë më produktive për Forcat tona të Armatosura”. Ajo e falenderoi homologun e saj në emër të qeverisë shqiptare për mbështetjen e padiskutueshme që i jep Shqipërisë drejt BE.
Më herët, në nder të vizitës së saj në Athinë, znj. Kodheli është nderuar me një ceremoni tejet të veçantë, e para e këtij lloji për një ministër shqiptar, në sheshin Sindagma, ku ajo vendosi një kurorë në monumentin e Ushtarit të Panjohur.
Deklarata për mediat nga ministrja e Mbrojtjes së Shqipërisë, znj. Kodheli dhe ministrit të Mbrojtjes së Greqisë, z. Avramopoulos
Ministri i Mbrojtjes Avramopoulos:
Unë sot pata nderin dhe kënaqësinë e veçante të mirëpres këtu, në Ministrinë e Mbrojtjes, homologen dhe miken time, znj. Mimi Kodheli, ministre e Mbrojtjes e Shqipërisë.
Greqia dhe Shqipëria, siç edhe dihet, janë dy vende fqinjë që kanë lidhje të forta historike e që datojnë mijëra vjet më parë. Grekët dhe shqiptarët kanë jetuar në paqe me njëri-tjetrin qysh prej lashtësisë. Ata jetojnë edhe sot me njëri-tjetrin përmes pranisë së minoritetit grek në Shqipëri, si edhe përmes qindra mijëra shqiptarëve që jetojnë, punojnë dhe zhvillojnë mirëqenien e tyre në Greqi.
Marrëdhëniet tona bazohen kryesisht në respektin reciprok, miqësinë dhe solidaritetin. Të dyja qeveritë, si e jona, ashtu edhe qeveria e re shqiptare, dëshirojnë të forcojnë dhe zgjerojnë bashkëpunimin në të gjitha fushat.
Ministre dhe mike ime e dashur,
vizita juaj e sotme në Athinë është shumë e rëndësishme dhe shënon një fillim të ri; gjithashtu ajo inauguron një kapitull të ri bashkëpunimi ndërmjet dy vendeve tona në fushën e Mbrojtjes. Sot patëm rastin t’ju prezantonim një briefing mbi sistemin grek të mbrojtjes dhe t’ju shpjegonim se është një nga sistemet e mbrojtjes më të mirë e më të besueshëm në Europë.
Qëllimi ynë, kauza primare së cilës ne duhet t’i shërbejmë, është integriteti dhe pavarësia e vendit tonë. Por në të njëjtën kohë, ne përthithim edhe mesazhet e kohës sonë. Ne jemi të dy vende anëtare të NATO, të vendosura të promovojmë paqen, stabilitetin, bashkëpunimin dhe miqësinë jo vetëm përbrenda marrëdhënies sonë dypalëshe, por edhe në rajon.
Në këtë frymë, sot, vendosëm të hapim një kapitull të ri në marrëdhënien tonë dypalëshe në fushën e Mbrojtjes.
Gjatë bisedimeve që patëm pak më parë, kërkuam dhe shqyrtuam të gjitha mënyrat e mundshme për të përforcuar më tej bashkëveprimin dypalësh. Ne kemi eksperiencën, know-how, infrastrukturën dhe besojmë që bashkëveprimi ndërmjet nesh do të jetë shumë i dobishëm për sistemin e mbrojtjes të Shqipërisë, veçanërisht në momentin kur ju keni përgatitur dhe po aplikoni një plan të ri riorganizimi për Forcat e Armatosura shqiptare.
Ky është mesazhi që ne duam t’u përcjellim të gjithëve sot. Është një mesazh paqe dhe stabiliteti për rajonin tonë, Europën Juglindore dhe gjithë Ballkanin, por edhe një mesazh i vendosmërisë sonë për të bashkëpunuar më ngushtë dhe për të thelluar, zgjeruar dhe forcuar marrëdhëniet tona dypalëshe në fushën e Mbrojtjes, dhe jo vetëm.
Së fundi, do të doja t’ju falënderoj juve personalisht dhe delegacionin që ju shoqëron për bisedimet vërtet të dobishme dhe të frytshme që zhvilluam sot. Biseduam me njëri-tjetrin me ndershmëri dhe besim. Jam i sigurt se këto dy principe janë shumë të rëndësishme në marrëdhëniet mes dy shteteve, por edhe më të rëndësishme në marrëdhëniet mes dy popujve fqinjë, të cilët kanë kaluar shumë situata të vështira në të kaluarën, por tani ne jemi të bashkuar nga perspektiva jonë e përbashkët europiane.
Edhe një herë, me rastin e vizitës së znj. Kodheli, do të doja të shpreh mbështetjen e plotë të vendit tonë drejt rrugës europiane, drejt perspektivës europiane të Shqipërisë.
Uroj që ftesa për të nisur sa më shpejt që të jetë e mundur bisedimet t’i dërgohet së shpejti Shqipërisë. Shqipëria zë një vend të veçantë, jo vetëm në rajonin e gjerë të Europës Juglindore, por në Europë në përgjithësi, ku ne do të takohemi për të vijuar rrugën tonë të përbashkët.
Unë jam i bindur se forcimi i marrëdhënieve tona dypalëshe dhe kontaktet hapin perspektiva të reja për sigurinë dhe prosperitetin e jo vetëm popujve të vendeve tona, por edhe më gjerë për popujt e rajonit të Europës Juglindore.
Ministrja, mike ime e dashur, Mimi Kodheli,
Ju ftoj edhe një herë në Athinë. Faleminderit për bashkëpunimin e veçantë që ne nisëm disa muaj më parë, kryesisht pas vizitës sime në Shqipëri, teksa shoqëroja presidentin e Republikës helene, z. Papoulias, dhe për domethënien që i kemi dhënë kuadrit të bashkëpunimit tonë.
Së shpejti do të takohemi përsëri, shpresoj në fund të muajit gusht, për të përditësuar dhe përmirësuar bashkëpunimin tonë të vjetër në fushën e Mbrojtjes mes dy vendeve tona dhe siç patëm mundësinë të biem dakord sot, do të vijojmë me nënshkrimin e një bashkëpunimi të ri.
Gjithashtu, ky nënshkrim do të jetë vula që do të ratifikojë dhe konfirmojë vendimet që morëm sot dhe kryesisht, ajo do të hapë një perspektivë të re të marrëdhënieve tona dypalëshe në fushën e Mbrojtjes.
Ministrja e Mbrojtjes Kodheli:
Para së gjithash, dëshiroj T'ju falenderoj z. Avramopoulos, për pritjen e përzemërt që na dedikuat dhe për diskutimet shumë të frytshme dhe rezultative që sapo përfunduam.
Ndonëse kjo është vizita ime e parë zyrtare në Athinë, kam pasur kënaqësinë të takoj homologun dhe kolegun tim, z. Avramopoulos në Bruksel gjatë takimit të ministrave të Mbrojtjes, si dhe në Tiranë nëntorin e kaluar.
Po ashtu, kam pasur kënaqësinë të takoj edhe zj. Gennimata në muajin tetor të vitit që shkoi në Slloveni. Ky është një tregues i qartë i rëndësisë që të dy vendet tona i kushtojnë bashkëpunimit dypalësh.
Dëshiroj të përmend gjithashtu, takimet intensive të nivelit të lartë të zhvilluara në kuadrin e bashkëpunimit dypalësh, që nga ardhja në pushtet e qeverisë së re shqiptare, që ështe një tregues se Greqia mbetet një partner i rëndësishëm politik dhe ekonomik për Shqipërinë.
Duke qenë se kjo vizitë përkon me marrjen e Presidencës së Bashkimit Europian nga ana e Greqisë, dëshiroj të përfitoj nga ky rast, për t’i uruar qeverisë greke një presidencë të suksesshme, dhe t'i shpreh asaj mirënjohjen për mbështetjen që i ka ofruar Shqipërisë në rrugën e anëtarësimit për në Bashkimin Evropian.
Është kënaqësi e veçantë të theksoj se 35 studentë shqiptarë vazhdojnë studimet këtu në Greqi, në të treja forcat. Po ashtu, është interesant fakti që 2 oficerë grekë përfunduan në muajin dhjetor Kursin e Lartë të Sigurisë dhe Mbrojtjes në Shqipëri. Ne besojmë se kjo tendencë do të vazhdojë edhe në të ardhmen. Përveç bashkëpunimit si dy anëtarë të NATO, bashkëpunimi në kuadrin e iniciativave rajonale, siç është takimi i ministrave të Mbrojtjes të Evropës Juglindore, merr në fakt një rëndësi të veçantë.
Në përfundim dëshiroj të theksoj faktin se Shqipëria vlerëson në mënyrë të veçantë bashkëpunimin me Greqinë dhe jemi të angazhuar për ta forcuar atë më tej në të ardhmen, dhe kjo është edhe arsyeja pse une jam këtu.
Jam e kënaqur dhe vlerësoj në mënyrë të veçantë faktin që z. Avramopoulos, në të gjitha takimet që ne kemi pasur ka shprehur angazhimin dhe gatishmërinë e tij për të ndihmuar Forcat e Armatosura të shqiptare, kudo që të jetë nevoja. Kjo është në fakt edhe ajo çka ai ka bërë deri më tani, në çdo pozicion që ka mbajtur. Ai është mik i shtrenjtë edhe mbështetës i Shqipërisë dhe shpresoj të kem gjetur fjalët e duhura për të shprehur mirënjohjen time të thellë për atë çfarë ai ka bërë dhe po bën si i Mbrojtjes së Greqisë.
Shumë faleminderit mik dhe koleg i dashur.
