Ermal Nufi

Ministër i Mbrojtjes i Republikës së Shqipërisë
2026 -

Z. Ermal Nufi, prej marsit 2026, mban funksionin e ministrit të Mbrojtjes së Republikës së Shqipërisë.

Në këtë detyrë ai udhëheq politikat e Mbrojtjes dhe Sigurisë së vendit, duke kontribuar në forcimin e rolit të Shqipërisë në NATO, në zhvillimin e kapaciteteve të Forcave të Armatosura dhe në avancimin e bashkëpunimit strategjik me partnerët ndërkombëtarë të sigurisë dhe mbrojtjes.

Para emërimit në këtë detyrë, z. Nufi ka shërbyer si zëvendëssekretar i Përgjithshëm i Kryeministrisë së Republikës së Shqipërisë, ku ka kontribuar në koordinimin ndërinstitucional, mbështetjen ligjore dhe zhvillimin e proceseve të politikbërjes në nivel qendror të qeverisjes. Në këtë rol ai ka qenë i përfshirë në mbështetjen e proceseve vendimmarrëse të Këshillit të Ministrave dhe në koordinimin e iniciativave ligjore dhe institucionale në nivel qeveritar.

Z. Nufi ka përfunduar studimet e nivelit master në Drejtësi pranë Fakultetit të Drejtësisë të Universitetit të Tiranës në vitin 2010. Pas diplomimit ai ka ushtruar profesionin e tij si avokat dhe konsulent ligjor, duke punuar në sektorin privat dhe me organizata vendase dhe ndërkombëtare, me fokus në të drejtën civile, tregtare dhe çështjet e qeverisjes korporative.

Që prej vitit 2013 është i licencuar si avokat nga Dhoma Kombëtare e Avokatisë dhe ka shërbyer si anëtar i Këshillit Drejtues të Dhomës së Avokatëve të Tiranës. Në karrierën e tij profesionale ka mbajtur gjithashtu detyrën e këshilltarit ligjor pranë Ministrit të Infrastrukturës dhe Energjisë, si dhe atë të drejtorit të Kabinetit të Zëvendëskryeministrit.

Ai ka ushtruar gjithashtu funksione drejtuese në bordet e disa institucioneve të administratës publike dhe të sektorit të sigurisë dhe mbrojtjes. Me vendim të Këshillit të Ministrave, është emëruar kryetar i Bordit Menaxhues të Autoritetit Rrugor shqiptar dhe anëtar i Këshillit Drejtues të Agjencisë Shtetërore të Kadastrës, ndërsa në cilësinë ex officio ka kryesuar Bordin e Agjencisë Shtetërore të Informacionit Gjeohapësinor. Gjithashtu, ai ka qënë kryetar i Bordit të KAYO sh.a., shoqëri që operon në industrinë e mbrojtjes dhe sigurisë, duke ofruar produkte dhe shërbime për Forcat e Armatosura të Republikës së Shqipërisë dhe për tregjet ndërkombëtare.

Z. Ermal Nufi është i martuar dhe ka dy fëmijë.