Ministri Nufi në Bruksel, pjesëmarrës në Forumin Schuman për Sigurinë dhe Mbrojtjen të organizuar nga Bashkimi Evropian
Ministri Nufi: “Siguria jonë e përbashkët kërkon partneritete të besueshme, përgjegjësi të përbashkët dhe veprim konkret”
Ministri i Mbrojtjes i Republikës së Shqipërisë, z. Ermal Nufi mori pjesë në Edicionin e 3-të të Forumit Schuman për Sigurinë dhe Mbrojtjen, një platformë e rëndësishme për dialogun dhe bashkëpunimin ndërkombëtar mbi sfidat aktuale dhe të ardhshme të sigurisë.
Gjatë sesionit plenar me temë “Siguria globale në një mjedis në ndryshim: Partneritete të besueshme për një të ardhme më të sigurt”, Ministri nënvizoi se:
“Në një realitet gjeopolitik gjithnjë e më kompleks dhe të paparashikueshëm, siguria jonë e përbashkët kërkon më shumë se angazhime politike. Ajo kërkon partneritete të besueshme, përgjegjësi të përbashkët dhe veprim konkret”.
Në fjalën e tij, Ministri Nufi nënvizoi gjithashtu rëndësinë e forcimit të bashkëpunimit transatlantik, të koordinimit NATO-BE dhe të një mbrojtjeje evropiane që plotëson dhe forcon Aleancën. “Nga agresioni rus kundër Ukrainës te sfidat e sigurisë në Ballkanin Perëndimor, realiteti dëshmon se siguria e vendeve tona është e pandashme.” – u shpreh ai.
Ndër të tjera, Nufi cilësoi se “Shqipëria do të vijojë të jetë një aleate e përkushtuar e NATO-s, një mbështetëse e fortë e bashkëpunimit evropian dhe një kontribuuese aktive për paqen dhe stabilitetin rajonal e euroatlantik.”
Forumi Schuman për Sigurinë dhe Mbrojtjen është një platformë e nivelit të lartë e Bashkimit Evropian (BE), e dedikuar ndaj dialogut politik dhe strategjik ndërkombëtar mbi çështjet e paqes, sigurisë dhe mbrojtjes. Ai organizohet nga Shërbimi Evropian për Veprimin e Jashtëm (EEAS).
Edicioni i 3-të i këtij forumi mblodhi në Bruksel përfaqësues të nivelit të lartë politik dhe vendimmarrës nga më shumë se 85 vende partnere, përfaqësues të 27 vendeve anëtare të BE-së, përfaqësues të institucioneve të BE-së, përfaqësues të organizatave ndërkombëtare dhe rajonale, si dhe ekspertë të sigurisë, institute kërkimore dhe përfaqësues të botës akademike.
Artikuj nga Newsroom
Ministri Nufi prezanton projektbuxhetin 2027, 76.2 miliardë lekë për mbrojtjen, rritje me 10%
e premte, 06 nëntor 2026


