Kontributi i pazëvendësueshëm i Forcave të Armatosura menjëherë pas lëkundjeve të tërmetit të 26 nëntorit nuk u kalua pa vëmendje, jo vetëm nga krerët e shtetit por edhe nga opinioni publik.
Krerët më të lartë të Forcave të Armatosura falënderuan në një ceremoni efektivët e angazhuar në operacionet e kërkim – shpëtimit dhe të përballimit të pasojave që shkaktoi tërmeti i muajit të kaluar.
Shefi i Shtabit të Përgjithshëm të FA gjeneral brigade Bardhyl Kollçaku, zëvendësshefja gjeneral brigade Manushaqe Shehu dhe komandantët e forcave, takuan nga afër gratë dhe burrat në uniformë.
Shefi i Shtabit gjeneral brigade Bardhyl Kollçaku e konsideroi tërmetin e 26 nëntorit si një ngjarje më përmasa të mëdha, por gjithashtu vuri në dukje gatishmërinë e treguar nga efektivët e Forcave të Armatosura. “Tërmeti i 26 nëntorit ishte një goditje e rëndë dhe fatkeqësi e madhe për të gjithë vendin. Ai ishte një ngjarje jashtë fuqisë njerëzore për ta parashikuar dhe parandaluar, por ishte në detyrimin dhe përgjegjësinë tonë për të reaguar dhe vepruar me shpejtësi, siguri dhe saktësi. Unë besoj se ne u treguam në nivelin e detyrës. Duke shprehur konsideratën dhe respektin, për rolin dhe kontributin e të gjithë aktorëve, faktorëve, shqiptarë dhe të huaj, gjykoj se ndërhyrja dhe përfshirja e FA ishte vendimtare dhe në shumë kuptime shpëtimtare.” – u shpreh gjeneral brigade Kollçaku, i cili theksoi edhe nevojën për të nxjerrë mësime nga ajo katastrofë. “Situata dhe emergjenca e tërmetit të fundit ishte një test i nxehtë për kapacitetet, gatishmërinë dhe aftësinë e FA. Sigurisht që ne kemi mbajtur shënime dhe po nxjerrim mësime. Megjithatë testi i tërmetit nuk ishte vetëm për FA. Jam i sigurt se të gjithë aktorët e vendit kanë nxjerrë mësime. Në besojmë se është në interesin e përbashkët, në interes kombëtar që mësimet e nxjerra të konsiderohen, analizohen dhe vlerësohen bashkërisht nga të gjitha institucionet nga aktorët që u përfshinë në këtë emergjencë. Konsolidimi i kapacitetit të integruar kombëtar për emergjencat, ku midis të tjerave thithja e ushtarakëve të përshtatshëm në rezervë, do të ishte një nga veprimet më të domosdoshme dhe të zgjuara dhe do të na siguronte që operacionet e emergjencave civile do të ishin më efektive dhe kosto minimale të mundshme.”
Komandanti i Forcës Tokësore gjeneral brigade Albert Mullai nënvizoi gatishmërinë dhe profesionalizmin e strukturave që ai drejton, jo vetëm menjëherë pas tërmetit, por edhe më pas. “Sapo morëm sinjalin, Forca Tokësore operoi sipas një plani të mirëmenduar, të parapërgatitur e të testuar në stërvitjet e mëhershme. Efektivët e Forcës Tokësore treguan angazhim të jashtëzakonshëm në këtë situatë tepër kritike për tërë vendin. Batalionet e Forcës Tokësore me vetëmohim dhe përkushtim, humanizëm dhe profesionalizëm të lartë, u përfshinë intensivisht në operacione kërkim - shpëtimi që në momentet e para. FT si pjesë integrale e FA, u angazhua në operacione kërkim – shpëtimi, ngritje kampingu e çadrash, për bashkëpunim me ekipet e huaja, në transport ndihmash shtëpi më shtëpi duke shpëtuar çdo jetë njerëzore.”
Menjëherë pas lëkundjeve të tërmetit të 26 nëntorit, Forcat e Armatosura dhanë kushtrimin dhe çdo efektiv u vu në gatishmëri, ndërkohë që një pjesë u angazhuan brenda 40 minutash në operacionet e kërkim – shpëtimit, ku nxorën njerëz të gjallë nga rrënojat.
Në fazën e parë të kërkim – shpëtimit dhe fazën e dytë të lehtësimit dhe riaftësimit të pasojave, e cila ende vijon, Forcat e Armatosura kanë angazhuar rreth 7 mijë trupa dhe rreth 2 mijë mjete ushtarake.
VIDEO
© Ministria e Mbrojtjes 2024 - Të gjitha të drejtat e rezervuara.