Newsroom Konstituohet Komiteti i Emergjencave Civile, mbështetje për projektin e rehabilitimit të Bërdicës
Rehabilitimi i dëmeve që ka sjellë dalja nga shtrati i lumit Drin në Bërdicë të Shkodrës është vendimi i parë i Komitetit të Emergjencave Civile të saporikonstituuar. Komiteti diskutoi gjithashtu mbi situatën si pasojë e reshjeve në vend, masat e marra dhe pritshmëritë meteorologjike.
Ministri i Mbrojtjes Niko Peleshi u shpreh se është bërë i mundur evakuimi në kohë i familjeve të prekura dhe se deri më tani nuk ka pasur asnjë humbje jete. “Kanë qenë prurje të mëdha, kemi mundur të largojmë nga rreziku të gjitha familjet. Nuk kemi dëme në njerëz, ndërsa edhe dëmet materiale i kemi minimizuar aq sa nuk ka të krahasuar me të shkuarën”, - tha Peleshi.
Në mbledhjen e tij të parë ku u bë dhe konstituimi i këtij komiteti, drejtori i Përgjithshëm i Agjencisë Kombëtare të Mbrojtjes Civile, Haki Çako bëri një përmbledhje të situatës së deritanishme, ku pavarësisht reshjeve të dendura, ai tha se situata është nën kontroll. Një ndikim të madh në situatën e krijuar ditët e fundit nga reshjet në veri të vendit kanë pasur prurjet e konsiderueshme të liqenit të Shkodrës, lumenjve Gjadër dhe Kir. Menaxhimi i mirë i kaskadës së lumit Drin ka mundësuar stabilitetin e situatës.
Ministrja e Infrastrukturës dhe Energjisë, Belinda Balluku u shpreh se është bërë një menaxhim i mirë i kaskadave për të kontrolluar nivelin e prurjeve dhe të largimit të ujit. Ministrja Balluku bëri me dije se është bërë e mundur hapja e të gjitha akseve, me përjashtim të Thethit, ku ajo kërkoi edhe ndihmën e Forcave të Armatosura me mjete të rënda.
Ministrja e Bujqësisë dhe Zhvillimit Rural, Milva Ekonomi informoi se falë marrjes së masave në kohë, të gjithë hidrovoret janë në funksion të plotë për largimin e ujit, ndërsa pastrimi dhe ndërtimi i argjinaturave mbrojtëse ka bërë që edhe lumenjtë të jenë nën kontroll. Znj. Ekonomi kërkoi edhe mbështetjen e Ministrisë së Mbrojtjes dhe Agjencisë Kombëtare të Mbrojtjes Civile për të bërë të mundur që pas kalimit të situatës të ndërhyhet për rehabilitimin e dëmeve që ka sjellë dalja nga shtrati i lumit Drin në Bërdicë të Shkodrës.
Shefi i Shtabit të Përgjithshëm të Forcave të Armatosura, gjeneralmajor prof. asoc. Bajram Begaj siguroi se janë vënë në dispozicion të gjitha kapacitetet operacionale për përballimin e situatës, duke përfshirë edhe disa mjete të rënda.
Drejtori i IGJEUM bëri të ditur se pas datës 13 janar pritet edhe një përmirësim i kushteve atmosferike që do të sjellë dhe tërheqjen e lumenjve brenda shtratit të tyre.
