Më datë 14 prill 2021 u mbajt takimi i posaçëm i ministrave të Jashtëm dhe atyre të Mbrojtjes të NATO-s, gjatë të cilit u adresua çështja e tërheqjes së trupave të Aleancës nga Afganistani.
Gjatë këtij takimi, ku morën pjesë ministrat Peleshi dhe Xhaçka, aleatët vendosën të nisin tërheqjen e trupave duke nisur nga data 1 maj 2021 dhe kjo tërheqje do të përfundojë në 11 shtator të këtij viti.
Shqipëria, konseguente në qëndrimet e saj, ka ndjekur parimin "Together In - Together Out". Edhe gjatë këtij takimi, ministri Peleshi në fjalën e tij rikonfirmoi mbështetjen për këtë vendimmarrje të Aleancës, duke u zotuar se vendi ynë do të vijojë kontributin në forcimin dhe mirëfunksionim e institucioneve demokratike në Afganistan, por edhe angazhimin tonë për pjesëmarrje aktive në sfidat e ardhshme me të cilat përballet NATO.
Ministri Peleshi e përshëndeti vendimin e këtij ministeriali të përbashkët në rrejtin social Facebook, duke u shprehur krenar për kontributin e ushtarakëve shqiptarë, pa harruar dëshmorin e atdheut, kapiten Feti Vogli.
“SHBA dhe NATO tërhiqen nga Afganistani - në ministerialin e sotëm të NATO-s, ku isha i nderuar të merrja pjesë, pas 20 vjetësh prezencë në atë territor u vendos që forcat aleate të fillojnë largimin nga Afganistani nga data 1 maj.
Krenar për mbështetjen e pakursyer politike dhe ushtarake të Shqipërisë prej vitit 2002 në përpjekjet e përbashkëta në Afganistan. Krenar për kontributin dhe sakrificat e FARSH. Sot është dita për të kujtuar dëshmorin e atdheut, kapiten Feti Vogli.”- shkroi ai.
Vlen të theksohet se në vitin 2001, menjëherë pas sulmeve të 11 Shtatorit në SHBA, NATO për herë të parë vuri në zbatim Nenin 5 të Traktatit të Uashingtonit. Ndërhyrja në Afganistan kishte objektivat të mirëpërcaktuar, që nga përballja me Al-Kaedën deri tek kthimin në normalitet të Afganistanit.
Shqipëria dhe Forcat e saj të Armatosura, edhe pse në atë kohë nuk ishin ende vend anëtar i NATO-s, u përgjigjën menjëherë dhe u solidarizuan duke dërguar trupat e parë në vitin 2002. Që prej atij viti, deri në mbyllje të misionit të NATO-s, në Afganistan kanë shërbyer mbi 4000 burra dhe gra në uniformë, duke kryer detyra të ndryshme, nga ato të mbështetjes shëndetësore deri tek pjesëmarrja në operacione luftarake. Sot më shumë se kurrë është koha të vlerësojmë sakrificën e gjithë ushtarakëve tanë që shërbyen në Afganistan, të shprehim mirënjohje për familjet e tyre dhe të përulemi me respekt për veprën e kapiten Feti Voglit, dëshmorit të atdheut i cili dha jetën e tij duke lartësuar dhe përjetësuar flamurin kombëtar në shërbim të paqes dhe sigurisë.
© Ministria e Mbrojtjes 2024 - Të gjitha të drejtat e rezervuara.