Ministri i Mbrojtjes Nufi takon presidentin kroat: Forcimi i paqes dhe stabilitetit, një interes i përbashkët

Në Zagreb, ministri i Mbrojtjes z.Ermal Nufi, u takua me presidentin e Republikës së Kroacisë z. Zoran Milanović. Takimi konfirmoi edhe një herë afrimin mes Shqipërisë dhe Kroacisë si aleate në kuadër të NATO-s.

Gjatë takimit u theksua se objektivi kryesor i bashkëpunimit mes Shqipërisë dhe Kroacisë është ruajtja dhe forcimi i paqes dhe stabilitetit në Evropën Juglindore, si një interes i përbashkët për të dy vendet.

Sa i përket bashkëpunimit në fushën e sigurisë dhe mbrojtjes mes dy vendeve anëtare të NATO-s, u nënvizua se po zhvillohet brenda kornizës së Aleancës.

Në fokus të bashkëpunimit konkret është zhvillimi i kapaciteteve ushtarake, trajnim i kapitalit njerëzor përmes programeve të avancuara të edukimit ushtarak dhe rritja e ndërveprueshmërisë operacionale, duke intensifikuar stërvitjet e përbashkëta në operacionet që zhvillohen në kuadër të Aleancës.

Një pikë kyçe gjatë takimit ishte krijimi i kuadrit ligjor për asistencë teknike gjatë procesit të anëtarësimit të Shqipërisë në Bashkimin Evropian.

Gjithashtu, presidenti kroat z. Zoran Milanović, rikonfirmoi vazhdimin e bashkëpunimit me Shqipërinë përmes nismave shumëpalëshe, veçanërisht përmes nismës SHBA - Karta e Adriatikut (A5).