Ministri i Mbrojtjes Ermal Nufi mikpret Komandantin e ri të KFOR-it, Gjeneralmajor Roberto Vergori

Ministri Nufi: “Shqipëria vijon kontributin aktiv në promovimin e sigurisë dhe stabilitetit në Kosovë dhe më gjerë”

Ministri i Mbrojtjes i Republikës së Shqipërisë, z. Ermal Nufi mikpriti sot në një takim Komandantin e ri të misionit të NATO-s në Kosovë (KFOR), Gjeneralmajor Roberto Vergori, me të cilin diskutoi mbi rolin e këtij misioni në garantimin e sigurisë dhe stabilitetit në Kosovë, si dhe kontributin e tij në ruajtjen e paqes dhe stabilitetit në rajon.

Gjatë takimit, Ministri Nufi nënvizoi rëndësinë e veçantë që KFOR-i ka për Shqipërinë.

“Kontributi ynë i vazhdueshëm dhe i palëkundur në këtë mision dëshmon rëndësinë e veçantë që i kushtojmë mandatit dhe rolit të tij në promovimin e sigurisë dhe stabilitetit në Kosovë dhe në mbarë rajonin.” – është shprehur Ministri i Mbrojtjes, Nufi.

Duke e uruar Gjeneralmajor Vergorin në përmbushjen e mandatit të tij, Ministri Nufi ka cilësuar gjithashtu se:

“Shqipëria mbetet e përkushtuar ndaj përgjegjësive të saj si anëtare e përkushtuar e NATO-s, duke vijuar të kontribuojë në përpjekjet e përbashkëta për një rajon më të sigurt, të qëndrueshëm dhe të orientuar drejt bashkëpunimit.”

Artikuj nga Newsroom