Testim aftësish për zbarkim amfib, Shqipëria dhe Turqia në stërvitjen e NATO-s “Neptune Strike 26-4”

e martë, 20 tetor 2026 14:25

Në Gjirin e Vlorës dhe në Bazën Detare të Pashalimanit, Forca Detare shqiptare dhe turke zhvilluan stërvitjen e përbashkët të NATO-s “Neptune Strike 26-4”, me fokus testimin e aftësive operacionale, rritjen e gatishmërisë dhe forcimin e bashkëpunimit mes aleatëve.

Fotogaleria

Në stërvitje morën pjesë një anije e Forcës Detare shqiptare, së bashku me Grupin Shqiptar të Bordingut, si dhe anijet e Forcës Detare turke “TCG Anadolu” dhe “TCG Gaziantep”.

Stërvitja përfshiu kapacitete zbarkimi, mjete ajrore pa pilot (UAV) dhe helikopterë.

Qëllimi i stërvitjes Neptune Strike 26-4”, ishte testimi i aftësive për dislokim dhe manovrim nga deti në tokë, demonstrimin e gatishmërisë dhe bashkëpunimin e aleatëve, forcimin e lirisë së lundrimit dhe manovrimit, si dhe rritjen e ndërveprueshmërisë të NATO-s në fusha të ndryshme operacionale.

Stërvitja “Neptune Strike 26-4” u ndoq nga afër nga zëvendësministri i Mbrojtjes z. Enkelejd Joti, zëvendësshefja e Shtabit të Përgjithshëm, gjeneral brigade Razie Mehmeti, komandant i Forcës Detare kundëradmiral dmiral Arsen Mullaj, ambasadori i Turqisë në Shqipëri, z. Barış Ceyhun Erciyes, atasheu ushtarak i Turqisë, kolonel Murat İlhan, komandanti i Grupit të Detyrës Amfibe të Forcave Detare turke, kundëradmiral Mevlüt Savaş Bilican, komandanti i Grupit të Anijeve Turke, kolonel Enis Tek, si dhe komandanti i anijes “TCG Anadolu” (L400), kolonel Sait Irkgrucu.