Zëvendësministrja e Mbrojtjes Dallëndyshe Bici priti në një takim komandantin e Forcës së Sigurisë së Kosovës, gjenerallejtnant Bashkim Jashari.
Pasi e uroi për marrjen e detyrës së re, zonja Bici e pergëzoi gjeneral Jasharin për përparimet shumë pozitive që ka bërë FSK, kryesisht me ndihmën e aleatit të përbashkët strategjik, Shteteve të Bashkuara.
Zëvendësministrja e njohu ushtarakun e lartë nga Kosova me vendimin e qeverisë shqiptare për të shtuar trupat shqiptarë në misionin e NATO-s në Kosovë, KFOR.
Dy bashkëbiseduesit folën edhe për planin e bashkëpunimit dypalësh në fushën e mbrojtjes, i cili përmban 50 aktivitete, kryesisht kurse, trajnime dhe stërvitje të përbashkëta.
Ata gjithashtu vlerësuan faktin që kadetë nga Shqipëria studiojnë Qendrën Stërvitore të FSK dhe kadetë nga Kosova ndjekin studimet në Akademinë e Forcave të Armatosura.
Më pas, komandanti i FSK, gjenerallejtnant Bashkim Jashari u prit në takim edhe nga shefi i Shtabit të Përgjithshëm të Forcave të Armatosura, gjeneralmajor Bajram Begaj.
