Shënohet 39-vjetori i krijimit të Bazës së Mbështetjes dhe Emergjencave Civile (BMEC)

Ministri Nufi: Gjatë këtij sezoni veror, mbi 1,500 efektivë të BMEC të angazhuar deri tani në situatën e zjarreve

Ministri i Mbrojtjes, z. Ermal Nufi ka vizituar Bazën e Mbështetjes së Emergjencave Civile (BMEC) në 39-vjetorin e krijimit të kësaj strukture, e cila është pjesë e Komandës Mbështetëse të Ministrisë së Mbrojtjes.

Gjatë vizitës, Ministri Nufi vlerësoi angazhimin e kësaj baze gjatë sezonit të vështirë të zjarreve.

Sipas tij, BMEC ka zhvilluar deri tani 54 operacione për shuarjen e zjarreve (periudha Prill-Gusht 2026) duke angazhuar mbi 1,500 efektivë dhe duke përdorur mbi 180 mjete.

“Kjo strukturë vazhdon të ngelet struktura operacionale, e cila është shtylla kurrizore e të gjithë veprimtarisë së mbështetjes në rastin e emergjencave civile, apo fatkeqësive natyrore në territorin e Republikës së Shqipërisë”, u shpreh ministri Nufi.

Duke u ndalur te puna e efektivëve në terren, Ministri shprehu mirënjohjen për të gjithë ata që kanë qenë në vijën e parë të përballjes me flakët.

“Jam krenar për përkushtimin e tyre, mirënjohës gjithësecilit prej tyre që ka qenë në vijën e parë të luftës kundër zjarreve në këtë sezon veror kaq të vështirë”, deklaroi Nufi.

BMEC vijon të jetë një strukturë kyçe në organizimin dhe mbështetjen e operacioneve të emergjencave civile, duke garantuar kapacitete njerëzore, logjistike dhe operacionale në përballimin e situatave të jashtëzakonshme në të gjithë territorin e vendit.

Artikuj nga Newsroom