Më datë 5 shkurt 2014, vjen për një vizitë zyrtare në Tiranë, kryetari i Komitetit Ushtarak në NATO, gjeneral Knud Bartels. Kjo vizitë është shprehje e vullnetit të përbashkët për të forcuar dhe avancuar më tej marrëdhëniet e mira mes NATO dhe Shqipërisë, si dhe angazhimit të qeverisë së re shqiptare për përmbushjen e detyrimeve tona kombëtare ndaj Aleancës.
Gjatë kësaj vizite me ushtarakun e lartë të NATO do të diskutohen çështje që lidhen me procesin e transformimit të FA shqiptare dhe për përmirësimin e aftësive të tyre ushtarake në mënyrë që të marrin përsipër përgjegjësitë e tyre të plota në kuadër të Komandës së NATO; prioritetet e FA për vitin 2014; vijimin e kontributit shqiptar në misionet paqeruajtëse të NATO; për bashkëpunimin rajonal; Samitin e NATO që do të mbahet këtë vit në Uells, etj.
Kryetari i Komitetit Ushtarak në NATO, gjeneral Knud Bartels do të pritet nga kryeministri i Shqipërisë, z. Edi Rama.
Më pas ai do të pritet me një ceremoni të veçantë ushtarake nga ministrja e Mbrojtjes znj. Mimi Kodheli, si dhe nga shefi i Shtabit të Përgjithshëm i FA, gjeneralmajor Jeronim Bazo.
© Ministria e Mbrojtjes 2024 - Të gjitha të drejtat e rezervuara.