Në sallën e mbledhjeve të Ministrisë së Mbrojtjes u zhvillua sot një ceremoni e veçantë me rastin e daljes në rezervë dhe largimit nga Forcat e Armatosura të kolonel Kristaq Xharo dhe nënkolonel Armir Çani. Në ketë ceremoni përcjelljeje ishin të pranishëm: zëvendësministri i Mbrojtjes, z. Petro Koçi, shefi i Shtabit të Përgjithshëm të FA, gjeneralmajor Jeronim Bazo, komandanti i Forcës Tokësore, gjeneralmajor Zyber Dushku, ushtarakë të lartë dhe punonjës civilë të Ministrisë së Mbrojtjes, Shtabit të Përgjithshëm, Forcës Tokësore, Komandës së Doktrinës dhe Stërvitjes, të Institutit Gjeografik dhe Infrastrukturës Ushtarake etj.
Shefi i Shtabit të Përgjithshëm i FA, gjeneralmajor Jeronim Bazo, në përshëndetjen e tij ndër të tjera theksoi se jemi mbledhur sot këtu për të përcjellë zyrtarisht dy ushtarakë të lartë të Forcave tona të Armatosura, kolonel Kristaq Xharo dhe nënkolonel Armir Çani, të cilët largohen nga radhët tona pas një karriere të gjatë dhe të spikatur në strukturat e FA. Në vijim, gjeneralmajor Bazo u ndal posaçërisht në karrierën e të dy ushtarakëve, të cilët ai i quajti “ushtarakë të mirë dhe të zotë, dy shokë të vjetër dhe me përvojë të gjatë e të suksesshme”. Gjeneralmajor Bazo i falënderoi ata në emër të të gjithë burrave dhe grave në uniformë për punën, arritjet dhe sakrificat që kanë bërë gjatë karrierës së tyre. Gjithashtu një falënderim të veçantë ai i drejtoi familjeve të dy ushtarakëve, bashkëshorteve dhe fëmijëve të tyre, për mbështetjen që i kanë dhënë atyre për përmbushjen me nder të misionit të tyre si ushtarakë të FA.
Më pas, shefi i Shtabit të Përgjithshëm i FA, gjeneralmajor Jeronim Bazo, me rastin e daljes në rezervë i dorëzoi kolonel Kristaq Xharos dhe nënkolonel Armir Çanit “Certifikatën e Mirënjohjes” me motivacionin: “Për kontributin e vyer dhe përkushtimin gjatë shërbimit më se 30 vjeçar në strukturat e Forcave të Armatosura të Shqipërisë”.
Në fund, kolonel Kristaq Xharo dhe nënkolonel Armir Çani falënderuan zëvendësministrin e Mbrojtjes Petro Koçi dhe shefin e shtabit të Përgjithshëm të FA, gjeneralmajor Jeronim Bazo, si dhe të gjithë të pranishmit për vlerësimin që i bëhet punës dhe karrierës së tyre të gjatë ushtarake, duke premtuar njëkohësisht se do të jenë vazhdimisht të lidhur shpirtërisht me FA dhe strukturat e saj, të cilave ata i kushtuan pjesën më të madhe dhe më vitale të jetës së tyre.
