“In memoria”, koncert në nderim të Ansamblit Artistik të Ushtrisë

e enjte, 17 dhjetor 2015 12:17

Foto Galeri

“In memoria”, ishte një aktivitet kushtuar figurave të shquara pjesë e Ansamblit Artistik të Ushtrisë.

Koncerti solli në kujtesë të të pranishmëve në sallë figurat e njohura themeluese të Ansamblit, si dhe figurat e artistëve të mëdhenj të ndarë tashmë nga jeta si: Gaqo Avrazi, Kujtim Laro, Vaçe Zela, Mentor Xhemali, Pandi Zguro, Tonin Tërshana etj. Ky koncert përkujtimor u drejtua nga prezantuesja ikonë e Ansamblit të Ushtrisë, znj. Flutura Çangu e kthyer në skenë pas 23 vjetësh, pikërisht për këtë aktivitet. Ashtu si në të shkuarën, kur Ansambli i Ushtrisë ngrinte peshë zemrat e të gjithë të pranishmëve në sallë, edhe në këtë shfaqje, numrat artistikë të përzgjedhur ishin të një niveli tepër të lartë. U rikthyen në skenë, nën logon e FA, emrat e njohur të muzikës si Arta Babaramo, Zina Zdrava, Sokol Tomorri, e deri tek talenti më i vogël, i dalë nga radhët e grupeve kulturore të QKMBMMSHP, Klajdi Milla. I ftuar nderi në shfaqje ishte edhe një tjetër figurë ikonë e artit shqiptar, violinisti virtuoz Ethem Qerimi, një instrumentist që ka qenë pjesë e Ansamblit të Ushtrisë. E veçanta e këtij koncerti ishte se ai ishte ideuar në formën e një bashkëbisedimi, ku të ftuarit ndanin kujtimet e tyre me pjesëmarrësit në sallë si: dirigjenti Alqi Lepuri, ish - drejtuesi i Ansamblit Myzaferr Pulaj, drejtuesi artistik i Estradës së Ushtrisë Verdi Take, drejtuesi i Orkestrës Frymore të Ushtrisë Fatmir Foçi etj. I gjithë aktiviteti u shoqërua me duartrokitje dhe ovacione të gjata.

Në fjalën e saj përshëndetëse ministrja e Mbrojtjes Kodheli ndau me pjesëmarrësit emocionet e saj lidhur me një epokë, të cilën ajo e cilësoi si epoka e lavdishme e të gjithë trashëgimisë kulturore që na la Ansambli Artistik i Ushtrisë. “Sot jetojmë në një epokë me një tjetër liri krijimtarie, në një tjetër natyrë performimi, por besoj që njerëzit e brezit tim apo më të mëdhenj se unë vazhdojnë të mbeten nostalgjikë të asaj çka artistët, përtej kushteve të vështira, realizuan jo vetëm në karrierën e tyre profesionale, por edhe transmetuan dhe na rritën ne me ndjenjën e atdhedashurisë”, tha zonja Kodheli. Më tej, ministrja Kodheli duke vlerësuar këtë aktivitet u kujtoi punën dhe veprën e jashtëzakonshme të artistëve të këtij Ansambli, duke filluar që nga i madhi kompozitori Çesk Zadeja, Tish Daija, Kujtim Laro, e duke vazhduar me të madhen Vaçe Zela e deri tek i sapondari nga jeta, Tonin Tërshana, si dhe shumë artistë, valltarë, kompozitorë, instrumentistë, këngëtarë, aktorë, regjizorë, skenaristë, të cilët ishin pjesë e kësaj epoke. “Le t’i kujtojmë të gjithë ata që e bënë këtë të mundur me këtë koncert modest dhe shpresoj shumë dhe besoj fort që do të vazhdojmë në këtë traditë për të mos harruar dhe respektuar të gjithë ata që janë larguar, ata që janë prezentë dhe të gjithë ata artistë që do të vijnë”, - ka përfunduar  ministrja Kodheli.

Ansambli Artistik i Ushtrisë u krijua më 25 korrik 1944 në Lavdar të Korçës, nga radhët partizanëve të Ushtrisë Nacionalçlirimtare. Artisti i Popullit Gaqo Avrazi është krijuesi i këtij institucioni artistik që do të shërbente më vonë si bazë për krijimin edhe të institucioneve të tjera artistike kombëtare në vend si Teatri Kombëtar i Operas dhe Baletit, Ansambli i Këngëve dhe Valleve Popullore etj. Në këtë ansambël kanë kontribuar me krijimtarinë e tyre artistike emra të mëdhenj të muzikës shqiptare si kompozitorët: Çesk Zadeja, Tonin Harapi, Nikolla Zoraqi, Tish Daija, Kujtim Laro e shumë të tjerë. Pjesë të këtij ansambli kanë qenë artistë të shquar si: Mentor Xhemali, Vaçe Zela, Gjoni Athanas, Ramiz Kovaci, Agim Tomorri, Tonin Tershana, Arta Babaramo, Zina Zdrava, Pandi Zguro etj.

Ky aktivitet ishte përgatitur nga Ministria e Mbrojtjes dhe Qendra e Kulturës, Medias, Botimeve të Mbrojtjes, Muzeut dhe Shtëpitë e Pushimit, nën kujdesin e veçantë të ministres se Mbrojtjes, znj. Mimi Kodheli. Të pranishëm në këtë aktivitet ishin: ministrja e Mbrojtjes, znj. Mimi Kodheli, shefi i Shtabit të Përgjithshëm i FA, gjeneralmajor Jeronim Bazo, gjeneralë dhe ushtarakë të lartë të Ministrisë së Mbrojtjes dhe FA, ish - drejtues artistikë dhe ish - artistë të Ansamblit të Ushtrisë, veteranë të luftës, artdashës të kryeqytetit etj.