Newsroom Përfshirja e FA është maksimale, ndërtime urash, rrugësh në Vlorë, Tiranë, Peshkopi; ndërhyrje në Shkodër, Lezhë e Krujë...
Përfshirja e vendit nga reshjet e dendura të ditëve të fundit ka shkaktuar përmbytje në disa zona duke sjellë angazhimin e fortë të FA në këto zona me probleme. Megjithëse situata sinoptike është në përmirësim, kapacitetet operacionale të njësive dhe reparteve të FA vazhdojnë të jenë në gatishmëri dhe të angazhuara në këto zona. Në kontakt të vazhdueshëm me Drejtorinë e Përgjithshme të Emergjencave Civile janë aktivizuar rreth 210 forca, mjete të kalueshmërisë së lartë dhe të ndërhyrjes së menjëhershme.
Në qarkun Shkodër u angazhuan dhe janë në gatishmëri 37 forca, mjete të kalueshmërisë së lartë si dhe motobarka shpëtimi. Janë evakuuar 13 banorë në fshatin Obot të Shkodrës. Mjetet dhe forcat pasi përfunduan detyrën u kthyen në repartin nr. 1010 pa probleme, ndërsa forca të tjera, mjete transporti dhe gomone vazhdojnë të jenë të dislokuara në Rep. Usht. Nr 1010 në pritje të angazhimit të mundshëm në operacione.
Në qarkun e Lezhës, FA kanë ndërhyrë që në orët e para të mëngjesit me 93 forca, motogjeneratorë të fuqishëm, motopompë, fadroma, ekskavator, mjete të kalueshmërisë së lartë dhe mbi 700 thasë me rërë. Në Prefekturën Lezhë është punuar për largimin e ujit me motopompë tek poliklinika e qytetit, tek ish - pularia dhe te Drejtoria e Shërbimit Pyjor (rreth 1300 m3 ujë). Gjithashtu është hedhur dhe niveluar me fadroma të xhenios dhe efektivat e FA rreth 35 m3 granil. Forcat e mjetet e FT janë angazhuar por dhe qëndrojnë në gatishmëri për një angazhim të mundshëm në operacione e tjera të EC edhe në qytetin e Lezhës.
Në qarkun e Vlorës dhe në qarkun e Fierit janë të angazhuara 17 forca dhe mjete të kalueshmërisë së lartë, motobarka dhe motopompa.
Forcat dhe mjetet qëndrojnë në gatishmëri në Batalionin e Këmbësorisë Poshnjë, Berat, në pritje për të ndërhyrë në rast nevoje.
Në qarkun e Tiranës, zona Babru, vijojnë të jenë të angazhuara 10 trupa, mjete dhe motobarka shpëtimi. Gjithashtu, tek Pallati me Shigjeta, një zonë e cënueshme nga përmbytjet, vijojnë të jenë të angazhuara 10 forca, motopompa dhe mjete të tjera shpëtimi; ndërsa në afërsi të “City Park” janë të angazhuara 10 forca dhe mjete zjarrfikëse. po ashtu ka forca dhe mjete të angazhuara në afërsi të Arkivës së Sigurimeve Shoqërore në Lundër. Po në qarkun Tiranë, Zall - Herr (Kallmet) janë të angazhuara dhe qëndrojnë në gatishmëri të lartë forca për të ndërhyrë në çdo moment; në zonën e Fushë - Krujës janë në gatishmëri 30 forca dhe mjete të kalueshmërisë së lartë si dhe motobarka shpëtimi.
Në qarkun e Durrësit, Bashkia Krujë, operacionet janë në vijim dhe janë të angazhuara forca, mjete të kalueshmërisë së lartë dhe motopompa e motobarka që qëndrojnë në gatishmëri. Nga batalioni i Xhenios kanë shkuar në qytetin e Krujës (lagjja Mezine) për vlerësimin e situatës dhe hartimin e planit të ndërhyrjes për masivin shkëmbor rreth 900 m3, i cili ka lëvizur nga vendi 1.5 m dhe rrezikon shembjen e banesave poshtë tij dhe dëmtimin e banorëve. Për shkak të rrezikshmërisë së lartë, është bërë evakuimi i 6 familjeve që banojnë poshtë këtij masivi, ndërkohë që është punuar gjatë gjithë natës për mbatjen e situatës nën kontroll. Ekipi është aktualisht në terren. Nga raportimet e deritanishme rezulton se po koordinohet me komunitetin dhe pushtetin vendor, ku janë siguruar kavot e gjata për fiksimin dhe sigurimin e masivit shkëmbor, sigurimin e zonës përreth dhe po fillon operacioni për “shkërmoqjen e tij”. Ky operacion parashikohet të zgjasë 4-5 ditë.
Në Bashkinë Burrel janë në gatishmëri 10 forca dhe mjete të kalueshmërisë së lartë.
Në Bashkinë Laç janë të angazhura 10 forca dhe mjete të kalueshmërisë së lartë.
Krahas angazhimit për EC, Komanda Mbështetëse do të angazhohet për ndërtimin e një ure bailey 21 m, në Brataj (lugina e lumit të Vlorës); riparim ure dhe zgjatjen e saj 9 metra në Petrelë Tiranë; riparim rruge në Zall - Bastar, si dhe rikonicion në zonën e Gjuricës dhe Llixhave, Peshkopi.
Vijojnë të jenë në gatishmëri shkolla e Bunavisë, Batalioni i Tretë i Këmbësorisë në Poshnje si dhe Detashmenti i Mbrojtjes Rajonale në Gjirokastër.
Efektivë të Forcave të Armatosura janë të pranishëm dhe të gatshëm për të ndërhyrë në të gjithë territorin e vendit, aty ku lind nevoja.
Situata e reshjeve po shkon drejt normalizimit, por rreziku i përmbytjeve nga dalja e lumenjve dhe prishja e digave akoma ekziston...
