FA vazhdon angazhimin për përmbytjet edhe pse situata është në përmirësim

e diel, 13 nëntor 2016 15:36

Foto Galeri

Edhe pse moti dhe gjendja e shkaktuar nga përmbytjet e ditëve të fundit po përmirësohen, Forcat e Armatosura të Republikës së Shqipërisë vazhdojnë të jenë në krye të detyrës në të gjitha zonat ku nevojitet ndërhyrja e tyre.

Në Dibër, Krujë dhe Vlorë, Forcat e Armatosura vazhdojnë të jenë të angazhuara, kryesisht për të riparuar dëmet e shkaktuara nga përmbytjet.

Në zonën e Dibrës, Forcat e Armatosura po punojnë për ndërtimin e argjinaturave të dëmtuara në Gjoricë.

Në Vlorë vazhdohet puna për rindërtimin për Urën e Silurakut në fshatin Brataj.

Në Krujë, Forcat e Armatosura janë të angazhuara për shembjen e kontrolluar të një masivi shkëmbor, i cili rrezikon jetën dhe banesat e banorëve atje.

Përmirësimi i ndjeshëm i motit ka bërë të mundur tërheqjen e trupave nga Lezha dhe Shkodra, duke qenë se rreziku nga përmbytjet ka kaluar.