Orkestra Frymore e FA performon me Shkollën Britanike të Muzikës për Orkestrat e Ushtrisë

e martë, 14 nëntor 2017 13:26

Fotogaleria

Në një aktivitet të organizuar në sheshin “Skënderbej” Tiranë, Orkestra Frymore e Forcave të Armatosura (OFFA) të Republikës së Shqipërisë, realizoi një performancë interpretimesh muzikore, së bashku me Shkollën Britanike të Muzikës për Orkestrat e Ushtrisë (UK Corps of Army Music, CAMUS), e cila ndodhet në një vizitë 2 - javore në Shqipëri. Të pranishëm në këtë aktivitet ishin zëvendësministri i Mbrojtjes z. Petro Koçi, përfaqësues së Ambasadës Britanike, si dhe përfaqësues nga Bashkia Tiranë.

Si vazhdim i trajnimeve dypalëshe, nëntë muzikantë britanikë nga Banda Muzikore e Divizionit të Princit të Wellsit, kanë ndërmarrë një vizitë pune 2 - javore në Shqipëri duke filluar nga 1 nëntori 2017. Muzikantët britanikë stërviten së bashku me Orkestrën Frymore të Forcave të Armatosura dhe si pjesë e turit të tyre, Zyra e Atasheut Ushtarak Britanik në Tiranë, organizoi këtë shfaqje interesante dhe specifike për publikun shqiptar.

Në përfundim të repertorit të tyre, pjesëtaret e OFFA u përshëndetën edhe nga zëvendësministri i Mbrojtjes Petro Koçi, i cili i falënderoi dhe uroi për bashkëpunime të tjera.

Shkolla Britanike e Muzikës për Orkestrat e Ushtrisë (UK Corps of Army Music, CAMUS) viziton rregullisht rajonin për trajnime dypalëshe ose me bazë të gjerë rajonale. Muzikantë nga orkestrat rajonale të Forcave të Armatosura luajnë së bashku dhe japin shfaqje muzikore nën drejtimin e CAMUS. Një iniciative e tillë u përkufizua si “Balkan All Star Band”. Grupimi final muzikor ka muzikantë nga vende te ndryshme te Ballkanit.