Samiti i NATO-s, ministri Peleshi takim me ndihmëssekretaren për Politikën e Mbrojtjes dhe të Jashtme në DASH, znj. Jessica Lewis

e premte, 12 korrik 2024 19:10

Ministri i Mbrojtjes Niko Peleshi zhvilloi gjatë Samitit të NATO, në Uashington një takim me znj. Jessica Lewis, ndihmëssekretare për Politikën e Mbrojtjes dhe të Jashtme, në Departamentin Amerikan të Shtetit.

Z. Peleshi siguroi znj. Lewis për angazhimin e Shqipërisë për të përmbushur të gjitha detyrimet që Ministria e Mbrojtjes dhe Forcat e Armatosura kanë në projektet e përbashkëta, të listuara në dokumentin “Lines of Efforts 2023-2027”, dokument ky i nënshkruar në shtatorin e vitit të kaluar në Tiranë, në përfundim të bisedimeve dypalëshe SHBA-Shqipëri në fushën e Sigurisë dhe Mbrojtjes.

Ministri i Mbrojtjes dhe zyrtarja e DASH diskutuan për situatën në Ukrainë dhe atë në Ballkanin Perëndimor. Z. Peleshi kërkoi vëmendje të shtuar të Shteteve të Bashkuara të Amerikës dhe aleatëve të tjerë kryesisht për Veriun e Kosovës, duke u shprehur shqetësimin për incidentet e herëpashershme të provokuara nga elementë me lidhje të ngushtë me Beogradin.

Në lidhje me situatën në Ukrainë, ministri i Mbrojtjes theksoi se Shqipëria do të mbetet thellësisht e angazhuar në ndihmën e saj ndaj popullit ukrainas. Teksa detajoi ndihmën logjistike që vendi ynë ka dhënë nga janari 2024, ministri Peleshi foli edhe për punën që po bëhet për paketat e reja të ndihmës dhe pjesëmarrjen në misionin trajnues “Interflex” për Forcat e Armatosura të Ukrainës.

Gjatë takimit u diskutua edhe për projektet e Korridorit VIII, Porto Romanos dhe rijetësimit të industrisë ushtarake. Në lidhje me këtë të fundit ministri Peleshi theksoi ofertën për bashkëpunim drejtuar firmave të mëdha amerikane që operojnë në këtë fushë.

Nga ana e saj, znj. Lewis rikonfirmoi mbështetjen e Shteteve të Bashkuara për Shqipërisë, aleatit strategjik të vendit tonë dhe një nga partnerët më të besueshëm në Ballkan.