Ministri Vengu inspekton ndërtimin e hangarit të ri të helikopterëve në Farkë: Investim domethënës

e hënë, 27 janar 2025 13:19

Shumë shpejt helikopterët “Black Hawk” të futur së fundmi në përdorim të Forcës Ajrore shqiptare do të kenë “shtëpinë” e tyre të re moderne, që i përmbush të gjitha kushtet për realizimin e misionit të tyre.

Ministri i Mbrojtjes Pirro Vengu i shoqëruar nga komandanti i Forcës Ajrore gjeneral brigade Ferdinant Dimo dhe komandanti i Bazës Ajrore Farkë, kolonel Ervin Buzi panë nga afër punimet për ndërtimin e hangarit të ri ku do të “strehohen” helikopterët e rinj dhe ekuipazhet e tyre.

Zoti Vengu e konsideroi ndërtimin e hangarit të ri si një investim shumë të rëndësishëm për operacionalitetin dhe gatishmërinë e mjeteve të reja: “Është një investim domethënës për nevojat e skuadronit të ri të pilotëve dhe teknikëve të helikopterëve Black Hawk. Për herë të parë ne do të kemi një njësi autonome, ku të gjitha nevojat që lidhen me pilotimin, mirëmbajtjen e mjeteve Black Hawk të realizohen në një mjedis mëse të përshtatshëm, dinjitoz dhe modern.” - u shpreh ai.

Nga ana e tij, komandanti i Forcës Ajrore Ferdinant Dimo, foli për rëndësinë e investimit dhe rritjen e operacionalitetit të skuadronit të ri: “Është një nga mjediset model në Bazën Ajrore të Farkës, i projektuar në bashkëpunim me aleatin tonë strategjik, Shtetet e Bashkuara të Amerikës. Hangari i ri do të ofrojë gjithçka që duhet që skuadroni i helikopterëve Black Hawk dhe ekuipazhet e tyre të realizojnë misionin e tyre. Skuadroni Black Hawk po kryen trajnimet e nevojshme që të kryejë jo vetëm transport trupash apo evakuime mjekësore, por të angazhohet edhe në emergjencat civile dhe operacionet e kërkim - shpëtimit.” - tha gjenerali.

Komandanti i Bazës Ajrore Farkë, kolonel Ervin Buzi informoi ministrin se skuadroni Black Hawk po trajnohet gjithashtu që nga lindja e diellit deri në perëndim të tij, të kalojë në gatishmëri 24 orë, për të realizuar operacione edhe natën.

Me përfundimin e ndërtimit të këtij hangari, Baza Ajrore Farkë dhe Forca Ajrore synojnë kryerjen e punimeve të mirëmbajtjes së helikopterëve Black Hawk në këto mjedise, ndërsa gjithashtu synohet që Dita e Aviacionit në vendin tonë më 24 prill, të festohet në mjediset e hangarit të ri.

Hangari i ri i helikopterëve në Bazën Ajrore Farkë është një investim prej rreth 489,8 milion lekësh dhe është bërë në bashkëpunim me palën amerikane për saktësimin e specifikimeve teknike në përputhje me standardet më të mira.