Kryeministri Rama dhe ministri Vengu inspektojnë Bazën Ajrore të Kuçovës

e martë, 18 mars 2025 16:43

Së bashku me kryeministrin Edi Rama, ministri i Mbrojtjes, Pirro Vengu inspektoi Bazën Ajrore të Kuçovës. Ministri Vengu e informoi kryeministrin rreth investimeve të realizuara.

Fotogaleria

Ministri Vengu e informoi kryeministrin rreth investimeve të realizuara: “Jemi në fazën e dytë e zhvillimit të Bazës Ajrore të Kuçovës, pasi u inaugurua edhe me mbështetjen e NATO-s. Puna ka vijuar për ndërtimin e objekteve të reja. Aktualisht jemi në zonën e fortifikuar të depove të municionit e armatimit, raketave dhe bombave drejtuese të aviacionit, ku kemi akomoduar të gjitha municionet dhe bombat drejtuese, që kanë ardhur së fundi së bashku me dronët kamikazë në zbatim të marrëveshjes me aleatin turk”, - tha Vengu.

Ministri tha se skuadrilja e dronëve luftarakë është rritur dhe është plotësisht operacionale duke mundësuar fluturimet edhe natën: “Janë të mobilizueshëm dhe totalisht të ndërveprueshëm”, - tha ministri Vengu.

Ministri i Mbrojtjes bëri të ditur gjithashtu se, sapo kanë përfunduar punimet e Qendrës Stërvitore, e cila është marrë tashmë në dorëzim.

Kryeministri pa nga afër një demonstrim të shkurtër nga misioni, që po realizonin dronët “Bajraktar” duke kryer monitorimin nga ajri të luginës së Vjosës me kërkesë të Agjencisë së Mbrojtjes Civile. Përveç patrullimit të kufirit detar apo tokësor, kjo qendër është në dispozicion për çdo detyrë që i ngarkohet nga agjencitë e tjera ligjzbatuese.

Ndër të tjera, ministri Vengu tha se, Shkolla e Pilotimit do të vendoset në Vlorë: “Baza taktike e Kuçovës ka një personel prej 350 personash, ndaj ne po rehabilitojmë edhe ish-Shtëpinë e Oficerëve në Kuçovë në mënyrë që të akomodohet gjithë personeli dhe familjarët”, - bëri të ditur ministri i Mbrojtjes.

Falë investimeve në infrastrukturë, modernizim e trajnime, Baza Ajrore e Kuçovës po kthehet në një aset strategjik të NATO.