Forca Ajrore shqiptare stërvitet me Forcën Ajrore amerikane, në fokus reagimi i shpejtë në kohë krize

Në Aeroportin Ndërkombëtar të Tiranës, Forca jonë Ajrore u trajnua me Forcën Ajrore të Shteteve të Bashkuara të Amerikës, duke forcuar më tej aftësitë mes dy vendeve aleate të NATO-s, në gatishmëri për çdo mision.
Stërvitja e përbashkët me Forcën Ajrore të Shteteve të Bashkuara u fokusua në forcimin e ndërveprimit, rritjen e gatishmërisë, reagimin e shpejtë në kohë krize, si dhe përvetësimin e procedurave bashkëkohore operacionale me aleatët e NATO-s.

Stërvitja u realizua në bashkëpunim me Skuadronin e 102-të të Shpëtimit të Forcës Ajrore të SHBA dhe kishte si qëllim trajnimin praktik të personelit të Forcës Ajrore shqiptare për procedurat e furnizimit me karburant në zona të përparuara (Forward Area Refueling Point – FARP).

Në pistën e Aeroportit Ndërkombëtar të Tiranës u realizua operacioni i furnizimit me karburant në zonë të përparuar (FARP), ku avioni ushtarak amerikan HC-130J Combat King furnizoi në tokë me karburant helikopterin UH-60 Black Hawk të Forcës Ajrore shqiptare, në gjendje të ndezur.

Pilotët e helikopterëve UH-60 Black Hawk, të cilët demonstruan edhe një herë profesionalizmin, ndërveprueshmërinë dhe aftësitë e tyre gjatë stërvitjes me ekuipazhin amerikan, theksuan se stërvitja ndihmoi në rritjen e aftësive operacionale: “Partnerët amerikanë kanë qenë shumë bashkëpunues me ne përgjatë gjithë kohës. Kjo stërvitje ka shërbyer për të rritur aftësitë tona pilotuese dhe për të qenë gati sa më shpejt në operacionet luftarake që mund të ndodhin në fushëbetejë”, - u shpreh toger Fabio Bardho, komandant ekuipazhi i helikopterit UH-60 Black Hawk.

Duke dhënë detaje nga trajnimi me partnerët amerikanë, nënkolonel Ervin Buzi, komandant i Bazës Ajrore të Farkës, u shpreh se kjo stërvitje është risi për vendin tonë, si dhe një mundësi për rritjen e aftësive të ekuipazheve tona: “Kjo stërvitje është risi për vendin tonë, duke qenë se me helikopterët Black Hawk po shkojmë në modalitete të tjera të kapaciteteve ushtarake. Është një mundësi për rritjen e aftësive të ekuipazheve tona për të kryer operacione dhe për t’u furnizuar pa ndaluar helikopterin, pa e fikur atë. Pra, ulemi, furnizohemi dhe lëvizim. Nëse misioni nuk ka kohë për pritje, ne ulemi, furnizohemi pa ndaluar dhe shkojmë përsëri në zonën e operacioneve. Kjo krijon vazhdimësi më të gjatë për të mbështetur trupat tona dhe është një hap i rëndësishëm në bashkëpunim me aleatët tanë, sidomos me aleatin amerikan në këtë rast, pasi jo vetëm po e rrisim këtë kapacitet, por në rast se gjendemi në të njëjtin teatër luftimi, ne mund ta kryejmë këtë mision. Ekuipazhet ajrore e kanë shumë të rëndësishëm komunikimin. Ne, në modalitetet tona të fluturimit, kemi një terminologji të caktuar, edhe në fluturimin pa ndaluar motorët. Për këtë lloj fluturimi ka një terminologji të veçantë që fillon nga komunikimi, procedura e afrimit, si dhe procedurat nëse kemi emergjenca, si rrjedhja e karburantit, zjarri që mund të marrë apo ndonjë element armik që mund të ndikojë në fushëbetejë dhe mënyra se si mund të largohemi”, - u shpreh nënkolonel Ervin Buzi, komandant i Bazës Ajrore të Farkës.

Ndërkohë, nënkolonel Richard Bloom, komandant i ekuipazhit të avionit ushtarak amerikan HC-130J Combat King, theksoi profesionalizmin e lartë të ekuipazhit të Forcës Ajrore shqiptare gjatë trajnimit: “Fillimisht falënderojmë Shqipërinë për mikpritjen e avionit tonë ushtarak HC-130J Combat King. Rëndësia e kësaj stërvitjeje qëndron te ndërtimi i marrëdhënieve me Forcën Ajrore shqiptare. Para së gjithash, ishte hera e parë që praktikuam operacionin e furnizimit në zonë të përparuar (FARP), që është një lloj i specializuar furnizimi me karburant. Është një aftësi e jashtëzakonshme sepse, kur arrin ta zotërosh, ndihmon që fuqia luftarake të projektohet më afër zonës së operacioneve, duke mundësuar kryerjen e misioneve dhe nxjerrjen e personelit në luftime shumë më shpejt. Shkëlqyeshëm. Kjo ishte hera e tyre e parë që kryenin operacione të furnizimit me karburant në zonë të përparuar dhe mund të them sinqerisht se kam parë shumë forca të armatosura, përfshirë edhe tonën dhe Forcat e Armatosura shqiptare ishin absolutisht profesionale. Ne ishim vërtet me fat që punuam me ta”, - u shpreh nënkoloneli amerikan Richard Bloom.

Stërvitja përfaqëson një hap të rëndësishëm drejt modernizimit të kapaciteteve ajrore dhe forcimit të bashkëpunimit ndërkombëtar të Forcës Ajrore shqiptare, veçanërisht me aleatët strategjikë të NATO-s dhe Bazën Ajrore të Avianos në Itali.

Bashkëpunimi mes Forcës Ajrore shqiptare dhe Forcës Ajrore amerikane është dëshmi e marrëdhënieve të shkëlqyera dhe e partneritetit të ngushtë mes Shqipërisë dhe SHBA në fushën e Mbrojtjes.

Artikuj nga Newsroom