Ministri i Mbrojtjes Ermal Nufi, vizitë në Divizionin e Anijeve Detare të FINCANTIERI në Itali

e premte, 07 gusht 2026 12:10

Ministri Nufi: "Njohje me praktikat më të mira për zbatimin e projektit të përbashkët Fincantieri Albania në Vlorë"

Në kuadër të partneritetit me FINCANTIERI, Ministri i Mbrojtjes i Republikës së Shqipërisë, z. Ermal Nufi zhvilloi një vizitë në Divizionin e Anijeve Detare të kompanisë në Muggiano, Itali.

Kjo është një prej qendrave më të rëndësishme të ndërtimit të anijeve ushtarake dhe sistemeve detare në Evropë.

Gjatë vizitës në kantier, ministri u njoh nga afër me proceset e projektimit, prodhimit dhe integrimit të platformave moderne detare, si dhe me standardet e avancuara të menaxhimit industrial, kontrollit të cilësisë dhe organizimit të një kantieri të integruar të ndërtimit të anijeve.

Në publikimin e tij në rrjete sociale, Ministri Nufi nënvizoi se:

"Vizita shërbeu si një mundësi shumë e mirë për shkëmbimin e përvojave dhe njohjen me praktikat më të mira të FINCANTIERI, në funksion të zhvillimit të kapaciteteve industriale në Shqipëri dhe zbatimit të projektit të përbashkët "Fincantieri Albania" në Vlorë."