Fjala e ministrit të Mbrojtjes, z. Ermal Nufi në Konferencën dy-ditore “Tirana Fire Safety 2026”

e enjte, 17 shtator 2026 14:33

Të nderuar organizatorë!

Është kënaqësi të jem këtu duke pasur parasysh rëndësinë e këtij aktiviteti.

Pikërisht në këtë moment kaq të rëndësishëm për të gjithë vendin tonë, kjo konferencë sjell në Tiranë ekspertizën dhe përvojat, perspektivat më të ndryshme mbi një çështje, e cila përtej dimensionit teknik, lidhet drejtpërdrejt me përgjegjësitë tona më themelore: që janë siguria e njerëzve dhe e komuniteteve tona.

Përgëzime organizatorëve për këtë nismë dhe i uroj mirëseardhjen në Tiranë të gjithë ekspertëve dhe profesionistëve vendas e ndërkombëtarë që janë bërë pjesë e saj.

Fakti që kjo konferencë bashkon institucionet publike, komunitetin profesional, akademikët dhe sektorin privat është shumë domethënës.

Siguria nga zjarri nuk është përgjegjësi e vetëm një institucioni. Ajo kërkon standardet më të mira të projektimit, zbatimit, inspektimit efektiv, teknologjisë moderne dhe, mbi të gjitha, bashkëpunim.

Ndër të tjera, kërkon diçka tepër të rëndësishme: një kulturë të re të sigurisë: një kulturë, e cila nuk pret që emergjenca të ndodhi në mënyrë që ne të veprojmë.

Këtu ndaj bindjen që siguria nuk fillon kur shpërthen zjarri, por ajo fillon shumë më herët. Si Ministër përgjegjës për mbrojtjen civile, kjo është edhe një nga qasjet themelore që ne po përpiqemi të konsolidojmë në Shqipëri.

Edhe në ligjin “Për mbrojtjen civile” ne e kemi të orientuar sistemin tonë drejt një qasjeje që vendos zvogëlimin e riskut, parandalimin, gatishmërinë, koordinimin dhe aftësinë ripërtëritëse të komuniteteve.

Me këtë sistem, përgjegjësia është e përbashkët dhe e shkallëzuar.

Emergjencat menaxhohen fillimisht me kapacitetet vendore, dhe kur situata i tejkalon ato, aktivizohen kapacitetet kombëtare. Ministria e Mbrojtjes, Agjencia Kombëtare e Mbrojtjes Civile (AKMC), Forcat e Armatosura dhe strukturat e Mbrojtjes nga

Zjarri dhe Shpëtimi, Policia e Shtetit, bashkitë, institucionet e tjera duhet të funksionojnë si pjesë e një sistemi të vetëm dhe të koordinuar.

Dhe pikërisht, përvoja e këtij viti na ka treguar edhe një herë rëndësinë jetike të këtij bashkëpunimi.

Si një nga verat më të nxehta gjatë viteve të fundit - e deklaruar kjo nga ekspertët ndërkombëtarë sipas edhe imazheve satelitore të Copernicus ,deri më 9 shtator: sistemi ynë i mbrojtjes civile është përballur me 81 raste zjarresh masive, që kanë kërkuar më shumë se 14,600 angazhime forcash dhe efektivësh, të shoqëruara me 1,350 angazhime mjetesh tokësore dhe 180 operacione ajrore.

Normalisht, pas këtyre shifrave janë njerëz, orë pune, sakrifica dhe përpjekjet e përbashkëta të Forcave të Armatosura, shërbimeve zjarrfikëse, strukturave të pushtetit vendor, Policisë së Shtetit, shërbimeve pyjore, administratës të zonave të mbrojtura, vullnetarëve dhe të gjithë aktorëve të tjerë të këtij sistemi.

Nga njërën anë, shifrat e lart-përmendur dëshmojnë kapacitetet tonë për të reaguar; por nga ana tjetër na japin edhe një mësim shumë të qartë: nuk mund ta ndërtojmë mbrojtjen civile vetëm mbi reagimin.

Ne duhet të jemi po aq të fortë në parandalim, sa ç'jemi ashtu edhe në reagim!

Kjo do të thotë më shumë investim në vlerësimin e riskut, planifikimin territorial, standardet e ndërtimit, sistemet e sigurisë së zjarrit, monitorimin, trajnimin dhe edukimin e qytetarëve, të cilat janë sot më të nevojshme se kurrë, dhe është pikërisht edhe arsyeja pse një konferencë si kjo e sotmja - ka rëndësi jetike: sepse vendos në fokus standardet e sigurisë, të cilët duhet të ecin me të njëjtin ritëm me zhvillimin e vendit.

Qytetet shqiptare po zhvillohen me shpejtësi, po gjithashtu po ndërtohen struktura gjithnjë e më të mëdha dhe komplekse, ndërsa infrastruktura dhe teknologjia po evoluon.

Ky fakt pa diskutim që sjell mundësi të reja; por është e pashmangshme që të mos sjellë edhe rreziqe të reja, të cilat duhet t'i parashikojmë dhe menaxhojmë që në fazën e projektimit.

Në këtë kuadër – sigurinë s’mund ta marrim si të mirëqenë; dhe siguria s’mund të jetë asnjëherë një mendim i mëvonshëm. Ajo duhet të fillojë që në projektim.

Një ndërtesë e sigurt nuk është thjesht një ndërtesë që i përmbush disa kërkesa në letër. Është një objekt ku standardet, projektimi, materialet, sistemet e alarmit dhe të shuarjes, evakuimit dhe përgjegjësia profesionale funksionojnë si e tërë.

Pikërisht këtu, merr vlerë të veçantë diskutimi se ekspertiza duhet të kthehet në standard, standardi në praktikë dhe praktika në siguri reale për qytetarin.

Dhe ky fakt - lidhet drejtpërdrejt edhe me punën tonë për mbrojtjen civile.

Prandaj – në dokumentet tona strategjike – siç janë Strategjia Kombëtare për Zvogëlimin e Riskut nga Fatkeqësitë; Vlerësimi Kombëtar i Riskut; dhe Plani Kombëtar për Emergjencat Civile – synohet të ndërtohet pikërisht një qasje ku risku merret në konsideratë përpara se të kthehet në krizë.

Një investim në parandalim, në standarde dhe në projektim të sigurt është gjithmonë më i vlefshëm se sa kostoja njerëzore dhe ekonomike e një fatkeqësie pasi ajo ka ndodhur.

Është shumë më e shëndetshme dhe më efektive të investojmë për të parandaluar një rrezik, sesa të paguajmë më vonë koston e pasojave të tij!

Dhe në këtë rrugëtim, Shqipëria ka edhe një mundësi të rëndësishme për të përfituar nga përvoja evropiane.

Pjesëmarrja jonë në Mekanizmin e Mbrojtjes Civile të Bashkimit Evropian nuk është vetëm një mundësi për të marrë mbështetje kur ne përballemi me emergjenca të mëdha, por është para së gjithash, një mundësi për të rritur standardet tona, për të trajnuar personelin, për të zhvilluar kapacitete të ndërveprueshme, për të marrë pjesë në stërvitje dhe për të sjellë në Shqipëri praktikat më të mira evropiane.

Ambicia është që këto standarde të mos mbeten thjesht një objektiv. Ato duhet të bëhen standardi i përditshëm i punës sonë!

Kjo nënkupton: më shumë profesionalizëm; më shumë përgjegjësi në projektim dhe në zbatim; në inspektime më efektive; teknologji më moderne; kapacitete më të trajnuara dhe të certifikuara; si dhe institucione që komunikojnë dhe ndër-veprojnë si një trup i vetëm.

Prandaj, edhe diskutimi që do të zhvillohet përgjatë kësaj konference dy-ditore në Tiranë, unë besoj që është jashtëzakonisht i rëndësishëm për Shqipërinë e sotme dhe për Shqipërinë që duam të ndërtojmë të nesërmen.
Siguria nga zjarri nuk është vetëm një detyrim teknik apo administrativ - ajo është pjesë e sigurisë publike, e cilësisë së zhvillimit urban dhe e qëndrueshmërisë së komuniteteve tona.

Ministria e Mbrojtjes së Republikës së Shqipërisë, Agjencia Kombëtare e Mbrojtjes Civile (AKMC) dhe jam i bindur të gjithë mekanizmat e tjera shtetërore do të vijojnë të mbështesin çdo nismë që sjell më shumë standarde, ekspertizë, teknologji, bashkëpunim dhe kulturë parandalimi.

Në këtë drejtim, ndaj bindjen e plotë se ambicies sonë për të pasur më pak emergjenca civile, më pak dëme dhe komunitete shumë më të sigurta i bashkohet edhe ekspertiza që do të përfitohet edhe nga kjo konferencë.
Mendoj të gjithë dakordësojmë që një vend i sigurt nuk është thjesht një vend që di të reagojë kur ka përballë një krizë; por është një vend, i cili di ta parandalojë krizën, ta ulë rrezikun dhe të mbrojë njerëzit përpara se ai rrezik të kthehet në një realitet.

Ky është drejtimi që ne kemi zgjedhur të ndjekim.

Pjesëmarrja e gjithë këtyre personaliteteve, profesorëve, e gjithsecilit prej jush që jeni aktorë në shoqërinë civile apo në botën e inxhinierëve, pedagogëve, e të gjithë atyre që janë përgjegjës në institucionet shtetërore që garantojnë sigurinë e ndërtesave nga zjarri – sot sjellin sot një ekspertizë, një dije e cila do t’i shërbejë qeverisë shqiptare në përgatitjen e të gjithë dokumenteve strategjike, për të bërë të mundur pikërisht rritjen e sigurisë dhe eficiencës së godinave dhe të gjithë mjedisit.

Prandaj ju falënderoj dhe ju uroj shumë suksese në këtë konferencë!

Faleminderit për ftesën që të jem këtu sot!