Fjala e ministres së Mbrojtjes Kodheli në Kuvend

Prej një jave mediat janë bërë pasqyrë e një shpërthimi ekstrem të politikës së baltës për të errësuar imazhin rilindas të FA. Ka një javë që opozita ngre në pikëpyetje, duke lënë të kuptojë se është në dijeni të një të vërtete të tmerrshme, por pa thënë asgjë tjetër përveçseqë unë, si ministre e Mbrojtjes, po e fsheh këtë informacion dhe nuk po bëj transparencë.

Më e bukura siç i thonë, por në fakt më e trishtueshmja në këtë rast, ështe se ndërkohë që disa zotërinj aspak qelibarë, pushtojnë ekranet me këtë lloj cinizmi dhe s’dëgjohet asnjë gazetar që të pyesë. Po mirë të akuzuarit dhe qeveria nuk japin shpjegime, po akuzuesit çfarë provash kanë? Do thoni ju zotërinj opozitarë të angazhuar në këtë përbaltje të ethshme, po pse duhet të na pyesë media ne dhe të mos na jepni ju llogari për akuzën tonë tronditëse?

Është shumë e thjeshtë, sepse unë kam një detyrë, të bëj punën aspak komode të ministres së Mbrojtjes, duke u marrë nga mëngjesi herët deri në darkë vonë me problemet e panumërta dhe për ju, për opozitën, për pyetjet, për pretendimet e saj, kam vetëm një ditë në javë, këtë ditë, ditën që vij në Parlament. Ndërsa ju, keni përditë detyrën që çdo akuzues ka në sistemin demokratik që keni zgjedhur, ta provojë akuzën e tij duke, së paku, bërë përpjekje që të provojë vetë akuzën. Sepse në demokraci barra e provës i takon atij që akuzon dhe jo atij që akuzohet. Por jo, me kë e keni, ju thjesht dhe vetëm akuzoni, pa dhënë asnjë provë, pa thënë asgjë më pak sesa infrastruktura e ushtrisë shqiptare është vënë në shërbim të trafikut të drogës dhe, asgjë më shumë se Shqipëria është bërë protektorat i drogës. Turp i madh. Sa qesharake aq edhe cinike kjo lojë. Por edhe sa e papërgjegjshme në raport me FA e këtij vendi dhe me vetë këtë vend, ku bëhet gjithë ky sforcim për të prodhuar gjithë këtë baltë.
Ju zotërinj, nuk keni asnjë provë mesa duket, por ajo çka unë mund t'ju them sot, është kjo: nuk ka asnjë provë të vetme dhe fakt të vërtetuar që Forcat e Armatosura, apo bazat e ushtrisë shqiptare janë të implikuara në veprimë kriminale për të cilat është folur kaq shumë këtë javë dhe për të cilat ju FA-të i keni akuzuar. Dhe nuk keni akuzuar vetëm FA-të por gjithë këtë vend.

Nuk ka asnjë provë dhe asnjë fakt, zero. Me përgjegjësinë time institucionale, si ministre e Mbrojtjes dhe si politikane, si përfaqësuese e popullit në këtë Kuvend, po jua përsëris qartë. Qysh prej gjysmës së shtatorit të vitit 2013 e deri më sot, gjatë gjithë kësaj kohe që kjo qeveri ka marrë këtë detyrë, nuk ka rezultuar në asnjë rast dhe në asnjë zonë ushtarake të RSH, të ketë një të dhënë të vetme të verifikuar ku ka lindur në fakt zanafilla e gjithë kësaj balte dhe tymnaje, e gjithë kësaj patologjie opozitare lidhur me FA. Nëse shqetësimi juaj buron, prej çka mund të ketë ndodhur përpara shtatorit të vitit 2013, pra në mars apo në shtator-tetor të një viti më përpara kur ju qeverisnit, kjo është një çështje tjetër për të cilën mbase duhet të na japë përgjigje ndonjë organ hetimi, por as unë, as Ministria e Mbrojtjes sot.

Mund t’ju them gjithashtu se qysh prej shtatorit të vitit 2013 nuk ka asnjë shërbim partner që të ketë bërë me dije Ministrinë e Mbrojtjes, apo organet e specializuara, të një prove të vetme, apo qoftë të një dyshimi për veprimtari ekstremisht kriminale, për të cilën ju keni një javë që drejtoni gishtin nga FA. Dhe ju e dini mirë, se ky vend është vend i NATO dhe, shërbimet partnere kanë marrë vesh, për shembull fjala që bie, deri edhe se sa para janë kërkuar e paguar nën dorë për listat e misioneve të djemve që shkonin në Afganistan. Apo për shembull sa herë kanë udhëtuar të dërguarit e ish-ministrit diku jashtë për të marrë në rrugë të paligjshme mjetet e përgjimit të opozitës. Apo në cilën mënyrë janë zëvëndësuar hard-disqet e aparaturës së fjalë.

Prandaj zotërinj, merreni me qetësi, siç këshillon shpesh kryetari i Kuvendit, këtë rrugën tuaj të re opozitare dhe mos e zhvilloni shumë fantazinë tuaj deri në këto nivele marramëndëse për të çoroditur publikun, pa dashur të dini se në këtë mënyrë nuk baltosni qeverinë, por Shqipërinë.

Sa për Ministrinë e Mbrojtjes dhe strukturat drejtuese ushtarake, ne jemi plotësisht të angazhuar që t’i kthejmë sektorit, dinjitetin e rrënuar, të zhdukim praktikat korruptive, t’i japim Shqipërisë vendin që i takon, jo vetëm fizikisht por moralisht dhe profesionalisht në tryezën e NATO. Në atë tryezë ku më vjen keq të them, e kishit vënë në pozitë shumë të vështirë Shqipërinë me bëmat dhe gjëmat tuaja, që aq mirë i dinë të gjithë, më mirë se ne, partnerët tanë ushtarakë.

Unë e siguroj Kuvendin e Shqipërisë dhe opinionin publik se FA, strukturat e saj të sigurisë, komandat, deri tek ushtarët e thjeshtë, kanë kryer tashmë të gjitha procedurat e nevojshme, duke i dhënë tashmë një rëndësi të veçantë procedurave të ruajtjes, përdorimit, shfrytëzimit dhe menaxhimit të çdo të dhëne sado e parëndësishme që është, me qëllim rritjen e sigurisë, disiplinës dhe garantimin e trajtimit profesional të gjithë volumit të informacionit që përpunohet në sektorët tanë, përballë kërcënimeve dhe rreziqeve të një bote përditë e më të sofistikuar e më agresive. Unë e shpreh sigurinë, jo vetëm në përgjegjësinë time të lartë, por edhe në cilësi të plotë që më jep fakti që këtë siguri e mbështes jo thjesht tek të dhënat tona, por padyshim te informacioni i plotë që shkëmbej rregullisht me partnerët tanë të cilët, pas jo pak ditësh të humbura, kanë rifituar besimin e plotë tek ekipi drejtues politik dhe ushtarak i dikasterit të Mbrojtjes; siç e kanë rifituar qetësinë e humbur deri dje prej shpërdorimit dhe abuzimit të çdo lloji që ata e konstatonin, për fat të keq pothuajse përditë.

Detyra dhe natyra shumë specifike e punës që kam nderin të bëj, e kufizon mundësinë time për t’i larë sot “hesapet politike” në këtë sallë dhe, për t’ia thënë në sy, ndokujt këtu e ndokujt jashtë këtyre mureve, të gjitha të vërtetat e mia si politikane për shpifjet e turpshme të kësaj jave. Por prapëseprapë nuk është e vështirë të kuptohet nga të gjithë ajo, që është fare e qartë për mua dhe për qeverinë. Vala e ngritur me akuza gjatë javës së fundit ka lidhje me nevojën therëse që kanë qoftë paraardhësi im, qoftë paraardhësi i kryeministrit tim për të penguar me çdo kusht dritën e ligjit mbi errësirën e paligjshmërisë shokuese të dosjeve të shpërdorimit të detyrës sa herë që flasim për ushtrinë. Uroj shumë të mos e ketë zënë gjumi në këtë rast edhe Prokurorinë e Përgjithshme mbi këto dosje, sidomos në tre prej tyre, që lidhen drejtpërdrejtë me raportin që ka pasur dhe duhet të ketë, kur flitet për sigurinë kombëtare. Ashtu sikundër, e garantoj popullin shqiptar se nuk është thjesht qeveria e Shqipërisë e interesuar që kultura e pandëshkueshmërisë në drejtimin e Ministrisë së Mbrojtjes dhe FA të marrë fund përmes hetimit dhe nxjerrjes së fajtorëve për rrënimin moral, profesional dhe financiar të ushtrisë në vitet e fundit të keqqeverisjes së opozitës së sotme.

Jo më kot, qysh në ditët e para që akuza skandaloze u artikulua në një formë gjysmë të dehur nga ai që në fakt duhet të mbulohet prej kohësh përballë prokurorëve, unë i jam drejtuar prokurorit të Përgjithshëm që ta hetojë sa më parë këtë akuzë. Jo më kot e kam përsëritur me shkrim kërkesën time ndaj z. Llalla dhe dua ta përsëris edhe sot: kjo akuzë duhet të hetohet në mënyrë të pavarur, pavarësisht se s’ka asnjë lloj prove për të, sepse në këtë lojë të shpifur politike nuk mjafton të hetohet vetëm akuza, por duhet hetuar edhe pse është hapur kjo lojë, nëse të gjithë themi dhe duhet të themi që ishte një gënjeshtër.

Por dua të shtoj që përtej kërkesave për të hetuar ish-ministrin e Mbrojtjes dhe kupolën në dikasterin tonë, si dhe kërkesës për hetim që kemi depozituar në Prokurorinë e Përgjithshme lidhur me akuzën e përsëritur pa pushim këtë javë, ne kemi bërë dhe shumë punë të mira. Punë që ne i kemi bërë në pak muaj, ndërkohë që ju nuk mundët apo nuk deshët që t’i bëni sidomos në këto vitet e fundit. Fjala vjen, ne hodhëm dritë mbi bregdetin tonë që ju e kishit lënë dy vjet e ca në errësirë. Përsa ju takon gjatë kësaj periudhe që keni qeverisur, nuk keni dalë akoma të thoni se çfarë ka ndodhur gjatë kohës që ishte errësirë në det. Si dhe pse ky vend i NATO, ndenji dy vjet e ca me radarë të prishur? Diçka kemi mundur të marrim vesh, vetëm e vetëm se kemi parë se çfarë shkruhet për Shqipërinë e errësirës suaj në vlerësimet e organizmave të specializuara të sigurisë dhe në analizat e shteteve aleate.

Dhe meqënëse jemi te aleatët, më lejoni për këtë herë mungesën e modestisë, sepse dua t’ju përcjell literalisht një vlerësim të tyre në njërin prej takimeve më të rëndësishme multilaterale. 'Ne vlerësojmë punën e filluar prej qeverisë suaj lidhur me ristrukturimin dhe rritjen e profesionalizmit të FA, por më së shumti me vendosjen në vend të dinjitetit të ushtrisë shqiptare, si një ndër sfidat më shpresëdhënëse të dekadës së fundit në rajon.' E pra, merreni me qetësi se pavarësisht çdo lloj përpjekjeje për të hequr vëmendjen nga mëkatet tuaja në qeveri, apo për të na penguar ne që të qeverisim, karvani ynë i gjatë do të shkojë vetëm përpara. Lerini djemtë dhe vajzat e thjeshtë nën uniformë të bëjnë detyrën e tyre fisnike.

Unë kaq kisha, tani ju bëni ç'të doni dhe shpifni sa të doni, deri të enjten tjetër nuk kam asnjë minutë për t’u marrë me diskutime pa bereqet.