Miratohet dokumenti i Rishikimit Strategjik të Mbrojtjes, i pari dokument i këtij lloji si vend aleat i NATO

11 prill 2013

Vendimi i KM, përshëndetja e kryeministrit dhe ministrit të Mbrojtjes në pdf

Këshilli i Ministrave të Republikës së Shqipërisë miratoi dokumentin e Rishikimit Strategjik të Mbrojtjes. Ai është dokumenti më i rëndësishëm për Sigurinë dhe Mbrojtjen dhe kryhet në kushtet kur Shqipëria është një vend aleat i Traktatit të Atlantikut të Veriut. Në këtë dokument bëhet një vlerësim analitik i mjedisit aktual dhe të pritshëm të sigurisë dhe të mbrojtjes, bëhet identifikimi i interesave dhe objektivave kombëtarë, argumentimi analitik për rolin e Forcave të Armatosura në këtë mjedis, sasia dhe cilësia e kapaciteteve që ato duhet të disponojnë sipas skenarëve më të mundshëm të përdorimit të tyre, si dhe organizimi i tyre në një forcë moderne e të besueshme për përmbushjen e misionit kushtetues, në kuadrin e mbrojtjes kolektive apo më vete.

Dokumenti i Rishikimit Strategjik të Mbrojtjes u iniciua nga kryeministri i Shqipërisë, u formulua nga ekipe të ekspertizës më të mirë kombëtare dhe u mbështet në mënyrë koherente nga aleatët e NATO. Rishikimi Strategjik i Mbrojtjes është një dokument për të gjithë: për politikanët, qytetarët, ekspertët, ushtarakët, gazetarët, grupet e interesit dhe shoqërinë civile, përfshi komunitetin ndërkombëtar. Botimi i hapur për publikun i këtij dokumenti, përveçse respektimit të normave demokratike, përbën një shprehje të transparencës në fushën e mbrojtjes. Procesi i Rishikimit të Strategjisë së Mbrojtjes i kaloi ndjeshëm përmasat e institucionit të Mbrojtjes. Në të u përfshinë mbi 150 ekspertë civilë dhe ushtarakë nga dhjetë institucione të tjera shtetërore, ndërsa u konsultua me aktorë të tjerë joqeveritarë e të shoqërisë civile.