Raporti vjetor i sekretarit të Përgjithshëm përcakton prioritetet për t'i dhënë formë “NATO të së ardhmes”

“Investimi në kapacitetet e duhura, ruajtja e forcave të lidhura, si dhe thellimi dhe zgjerimi i bashkëpunimit me vendet partnere janë thelbësore për t'i dhënë formë një NATO që është në gjendje të përmbushë sfidat e të ardhshmes”, - tha sekretari i Përgjithshëm i NATO, z. Anders Fogh Rasmussen në fillim të raportit të tij vjetor, të hënën më datë 27 janar 2014. “Në shtator, ne do të takohemi në Uells për të formësuar NATO e së ardhmes: një Aleancë që është e fortë, e ribalancuar dhe e gatshme të ofrojë siguri për gjeneratën e ardhshme”, shtoi sekretari i Përgjithshëm.

Nga raporti vjetor, i cili analizon atë çka NATO ka arritur vitin e kaluar dhe përcakton sfidat për vitin e ardhshëm, sekretari i Përgjithshëm nënvizoi se, NATO tani është më efektive dhe efikase se në çdo kohë të historisë së saj, por shtoi se, aleatët gjithashtu duhet të “ruajnë ritmin e transformimit” në Samitin e Uellsit.    

Z. Rasmussen theksoi se, NATO ka hedhur tashmë themele të forta gjatë viteve të fundit, bazuar në udhëzimet e dhëna nga Koncepti Strategjik, i cili përkrah angazhimin aktiv dhe mbrojtjen moderne. Në vitin 2013, aktivitetet e NATO u shtrinë nga operacionet ushtarake tek ndërtimi i marrëdhënieve me partnerët, nga përpjekjet për të siguruar dhe ruajtur kapacitetet e Mbrojtjes tek vijimi i reformave. “Ne vazhdojmë të garantojmë sigurinë e aleatëve tanë duke përmbushur tri detyrat tona kryesore: mbrojtjen kolektive, menaxhimin e krizave dhe sigurinë bashkëpunuese. Operacionet tona në Afganistan, Kosovë, në brigjet e Somalisë dhe dislokimi i raketave “Patriot” në Turqi janë shembuj të qartë. Forcat tona janë më të afta dhe më të lidhura se kurrë më parë”, - tha ai.     

Megjithatë, sekretari i Përgjithshëm tha se Aleanca duhet të investojë në përmirësimin e kapaciteteve për t’u përballur me rreziqe dhe sfida të tilla si, terrorizmi, pirateria, paqëndrueshmëri rajonale, si dhe sulmet raketore e kibernetike. Ai shtoi se aleatët europianë duhet të luajnë “plotësisht rolin e tyre” në zhvillimin e kapaciteteve kritike të tilla si inteligjenca, vëzhgimi dhe mbikëqyrja e përbashkët, si dhe mbrojtja raketore. Në lidhje me ruajtjen e forcave të ndërlidhura, z. Fogh Rasmussen tha se në Samitin e Uellsit, aleatët duhet të angazhohen në një program të gjerë stërvitjesh reale, trajnimi dhe edukimi si pjesë e Iniciativës së Forcave të Lidhura të NATO. Së fundmi, aleatët gjithashtu duhet të shikojnë përtej vetes, duke krijuar lidhje më të ngushta me partnerët, duke përfshirë mbështetjen e atyre partnerëve që kanë nevojë për ndihmë për të ndërtuar dhe zhvilluar sektorët e tyre të sigurisë. “Ne kemi një rekord arritjesh në operacionet sfiduese dhe në partneritetet anembanë botës dhe po përpiqemi të përshtatemi për ta bërë NATO më të zhdërvjellët dhe më efikase, në mënyrë që NATO të mbetet një burim thelbësor stabiliteti në një botë të paparashikueshme”, - tha sekretari i Përgjithshëm.

Marrë nga faqja zyrtare e NATO: www.nato.int