Kurset e karrierës

Kursi ka si qëllim përgatitjen e oficerit të shtabit të batalionit (ose ekuivalente), dhënien e njohurive në nivelin e brigadës, si dhe përzgjedhjen e oficerëve më të mirë për të vijuar karrierën si oficerë profesionistë. Në këtë kurs marrin pjesë të gjithë oficerët e specialiteteve të Forcës Tokësore, Forcës Detare dhe Forcës Ajrore, pas 2 vite kohë qëndrimi në gradën kapiten/kapitenlejtënant.
Zhvillohet në Kolegjin e Mbrojtjes dhe Sigurisë dhe zgjat 14 javë. Përfundimi i këtij kursi mundëson marrjen e gradës major/kapiten i rangut III.

Kursi ka si qëllim përgatitjen e oficerit të karrierës për të plotësuar detyra në nivel komandant batalioni dhe shtab brigade (ose ekuivalente) / force dhe jep njohuri për nivelin operativo - strategjik. Në këtë kurs marrin pjesë të gjithë oficerët e specialiteteve të Forcës Tokësore, Forcës Detare dhe Forcës Ajrore, që kanë gradën major/kapiten i rangut III, pas 3 vite kohë qëndrimi në këtë gradë.
Zhvillohet në Kolegjin e Mbrojtjes dhe Sigurisë dhe zgjat 1 vit akademik. Përfundimi i këtij kursi mundëson marrjen e gradës nënkolonel/kapiten i rangut II.

Kursi ka si qëllim përgatitjen e oficerit të karrierës për të plotësuar detyra në nivel operativo-strategjik. Në këtë kurs marrin pjesë të gjithë oficerët e specialiteteve të Forcës Tokësore, Forcës Detare dhe Forcës Ajrore që kanë gradën nënkolonel/kapiten i rangut II, pas 2 vite kohë qëndrimi në këtë gradë.
Zhvillohet në Kolegjin e Mbrojtjes dhe Sigurisë dhe zgjat 1 vit akademik. Përfundimi i këtij kursi mundëson marrjen e gradës kolonel/kapiten i rangut I.

Kursi ka si qëllim aftësimin e ushtarakëve dhe civilëve të niveleve strategjike në Ministrinë e Mbrojtjes, Forcat e Armatosura dhe institucionet e tjera të sigurisë së vendit dhe atyre analoge të vendeve të tjera.
Zhvillohet në Kolegjin e Mbrojtjes dhe Sigurisë në një periudhë 3 (tre) mujore. Programi i këtij kursi jep njohuri dhe trajnim analitik për probleme të Mbrojtjes dhe të Sigurisë, në nivelin kombëtar, rajonal e më gjerë. Kursi realizohet në gjuhën angleze. Për ushtarakët e karrierës është kusht për marrjen e gradës gjeneral brigade/kundëradmiral.

Kursi i Lartë i Sigurisë dhe i Mbrojtjes është kursi më i lartë në piramidën e arsimimit në karrierën ushtarake. Ky kurs aktualisht zhvillohet sipas një programi dhe metodologjie të ngjashme me qendrat dhe kolegjet e vendeve partnere. Kurrikula e këtij kursi, nisur dhe nga eksperienca shumë e mirë e realizimit të tij, ka bërë që të ndiqet edhe nga pjesëmarrës të ardhur nga vendet e rajonit, të NATO dhe ato të PfP.

Në kuadrin e qasjes rajonale Kolegji i Mbrojtjes dhe i Sigurisë ka ambicien që në një të ardhme të afërt në bashkëpunim me Fakultetin e Mbrojtjes dhe Sigurisë të kalojë nën frymën e ligjit “Për arsimin e lartë dhe kërkimin shkencor në institucionet e arsimit të lartë në Republikën e Shqipërisë”, ku kursantët e Kursit të Komandës dhe Shtabit të Përgjithshëm dhe Kursit të Lartë të Oficerit, përveç diplomës ose certifikatës për kurset institucionale të mund të marrin dhe diplomën “Master Profesional”, “Master Shkencor” në fushën e Mbrojtjes dhe të Sigurisë.