Forca Tokësore pajiset me sistemin raketor “Javelin”, ministri Vengu: Mesazh qartësie strategjike e partneritetit me SHBA

Në Komandën e Forcës Tokësore në Zall-Herr u zhvillua ceremonia e dorëzimit të sistemit raketor "Javelin", një kapacitet i ri për Forcat e Armatosura të Shqipërisë në kuadër të bashkëpunimit ushtarak me SHBA.

Fotogaleria

Në ceremoni morën pjesë ministri i Mbrojtjes Pirro Vengu, e ngarkuara me punë e SHBA në Tiranë Nancy VanHorn, shefi i Shtabit të Përgjithshëm të Forcave të Armatosura gjenerallejtënant Arben Kingji së bashku me drejtues dhe efektivë të Forcës Tokësore.

Në fjalën e tij, ministri Vengu theksoi se dorëzimi i sistemit "Javelin" përfaqëson një moment të rëndësishëm në forcimin e kapaciteteve mbrojtëse të vendit dhe në partneritetin strategjik me SHBA:
“Sot dorëzojmë në Forcën Tokësore sistemin Javelin, në tërësinë e këtij komponenti të porositur prej vitesh dhe pjesë e një bashkëpunimi të ngushtë me SHBA. Ky sistem nuk është thjesht një simbol force dhe kapaciteti, por edhe një mesazh qartësie strategjike”, - u shpreh ai.

Ministri theksoi se investimet në Mbrojtje janë një domosdoshmëri për garantimin e sigurisë dhe parandalimin e krizave: “Kostoja e përgatitjes është gjithnjë më e vogël sesa kostoja e papërgatitjes. Shqipëria ka zgjedhur të investojë në kohë paqeje, me plan dhe disiplinë buxhetore, për të rritur besueshmërinë dhe për të shkurajuar rreziqet me kapacitete reale”, - tha ministri Vengu.

Ai nënvizoi gjithashtu se forcimi i kapaciteteve ushtarake ka karakter mbrojtës: “Shqipëria nuk armatoset për të sulmuar askënd, por në mënyrë që askush të mos e vërë në provë”, - u shpreh ministri.
Ministri Vengu u shpreh se ka patur privilegjin të drejtojë këtë ministri, duke e cilësuar gjithashtu Mbrojtjen si një shtyllë të shtetit.

Nga ana e saj, e ngarkuara me punë e SHBA, Nancy VanHorn e cilësoi furnizimin me raketat "Javelin" si një hap të rëndësishëm në zhvillimin e partneritetit të sigurisë mes dy vendeve: “Furnizimi i këtyre raketave Javelin nga Shtetet e Bashkuara është një dëshmi konkrete e përkushtimit tonë për sigurinë rajonale dhe forcën e aleancës së NATO”, - tha ajo.

VanHorn theksoi se, sistemi përfaqëson teknologji të avancuar ushtarake dhe rrit aftësitë operacionale të forcave që e përdorin: “Këto sisteme u mundësojnë operatorëve të zhvendosen menjëherë pas gjuajtjes dhe kanë aftësi sulmi nga lart, duke goditur pikën më të dobët të blindimit armik”, - u shpreh ajo. Diplomatja amerikane nënvizoi gjithashtu rëndësinë e rritjes së investimeve në Mbrojtje dhe modernizimin ushtarak në kuadër të përgjegjësive të përbashkëta të aleatëve duke vlerësuar kontributin e Shqipërisë në misionet ndërkombëtare.

“Javelin” është një sistem raketor kundërtank i gjeneratës së fundit, i prodhuar nga SHBA. Sistemi është shumë efektiv kundër mjeteve të blinduara dhe përdoret gjerësisht nga ushtritë e NATO si dhe në operacione reale luftarake. Shqipëria e ka porositur sistemin “Javelin” në kuadër të programeve të bashkëpunimit ushtarak me Shtetet e Bashkuara, përmes mekanizmave të shitjeve ushtarake të huaja (Foreign Military Sales - FMS). Ky investim është pjesë e strategjisë afatgjatë të modernizimit të Forcave të Armatosura, rritjes së parandalimit dhe përafrimit të plotë me kapacitetet dhe doktrinën e NATO.

Artikuj nga Newsroom