Ministri Nufi, vizitë në Forcën Tokësore: Fokusi te modernizimi i FA

Ministri i Mbrojtjes Ermal Nufi, zhvilloi vizitën e tij të parë, pas marrjes së detyrës, në Komandën e Forcës Tokësore në Zall-Herr, ku shoqëruar edhe nga shefi i Shtabit të Përgjithshëm të FA gjenerallejtënant Arben Kingji u njoh nga afër me strukturat dhe kapacitetet e Forcave të Armatosura.

Fotogaleria

Gjatë vizitës në këtë njësi, e konsideruar si shtylla kurrizore e FA, ministri u njoh nga komandanti i Forcës Tokësore, gjeneralmajor Petrit Çuni me përditshmërinë dhe punën e efektivëve si dhe me sfidat dhe prioritetet e tyre.

Në takimet me gjeneralë, efektivë dhe drejtues të forcës u prezantuan objektivat kryesore dhe funksionimi i strukturave të Forcës Tokësore.

Ministri Nufi zhvilloi gjithashtu një takim të veçantë me shtabin dhe drejtuesit, ku u diskutua për vijimin e reformave dhe rritjen e kapaciteteve operacionale.

Ministri i Mbrojtjes inspektoi edhe ambientet e Qendrës taktike, rajonit stërvitor MADM si dhe Batalionit të Këmbësorisë së Lehtë, të vendosura në Komandën e Zall-Herrit, ku pati mundësi të shohë nga afër nivelin teknik dhe përgatitjen e trupave.

Ministri u njoh edhe me llojet e ndryshme të armatimeve, pjesë e investimeve të fundit në FA, siç është edhe sistemi raketor kundërtank "Javelin", i cili iu dorëzua Forcës Tokësore pak kohë më parë, në kuadër të bashkëpunimit ushtarak me SHBA.

Gjatë bisedës me drejtuesit e strukturave, ministri Nufi theksoi rëndësinë e përkushtimit ndaj uniformës dhe standardeve profesionale: “Është shumë e rëndësishme që njerëzit ta duan uniformën dhe kur shikon një standard të tillë, na bën të ndihemi krenarë për nivelet teknike që kanë arritur Forcat e Armatosura shqiptare", - theksoi ministri Nufi.

Gjatë vizitës u theksua angazhimi për forcimin dhe modernizimin e mëtejshëm të Forcave të Armatosura.