Forca Tokësore nga sot ka një komandant të ri. Gjeneral brigade Arben Kingji u prezantua në një ceremoni të posaçme nga ministrja Olta Xhaçka dhe shefi i Shtabit të Përgjithshëm të FA, gjeneralmajor Bajram Begaj.
Ministrja Xhaçka e konsideroi një moment shumë të rëndësishëm ndërrimin e komandantit të komponentit më të madh të Forcave tona të Armatosura, duke e vlerësuar gjeneral brigade Kingjin për aftësitë dhe përvojën e tij.“Unë nuk kam dyshim që sot stafeta e komandës së Forcës Tokësore kalon sot në duart të sigurta. Tek një njeri që do dijë të çojë përpara e të zhvillojë më shumë atë që kemi arritur të ndërtojmë deri më sot. Stafeta e drejtimit të Forcës Tokësore i kalon sot një ushtaraku të kalibrit të gjeneral Kingjit, nga një tjetër ushtarak me vlera e shumë arritje, siç është gjeneral Mullai.”- u shpreh Xhaçka.
Më tej, ministrja Xhaçka e vuri theksin te sistemi i meritokracisë i vendosur rishtaz në Forcat e Armatosura, pa harruar përmirësimin e trajtimit financiar të ushtarakëve dhe modernizimin e strukturave me mjete, pajisje dhe armatim. “Emërimi i komandatit të ri, është një sinjal i qartë i filozofisë mbi të cilën funksionojnë sot Forcat e Armatosura. Emërime larg miqve, politikës e tarafeve, por thjesht e vetëm mbi bazën e meritokracisë. Kemi ende shumë punë përpara, por mund të ndihemi mirë të gjithë për atë që kemi arritur ndërkaq. Duke filluar nga rritja e trajtimit financiar për vështirësinë e punës, apo rikthimi i kompensimit për ushqimin, kompletimi me pajisje individuale të standardizuara të ushtarit, apo certifikimi nga NATO i Grup Batalionit të Këmbësorisë dhe Kompanisë së Dytë të Batalionit Komando. Zhvillime që kanë ardhur në kontekstin e një sërë punësh të mira e zhvillimesh që kanë prekur çdo komponent të FA.”
Gjeneral brigade Arben Kingji zëvendëson në këtë detyrë gjeneral brigade Albert Mullai, i cili shërbeu në këtë detyrë që nga muaji shkurt i vitit të kaluar.
